Shillong Jymmang 30: Ka Meghalaya Tourism Development Forum (MTDF) hynne ka sngi Thohdieng kala kyntu ia ki lad pathai khubor haka ri India ba kin don lem ia ka jingkitkhlieh haba ki ai ia kino kino ki khubor kiba iadei bad ka thain shatei lammihngi jong ka ri.
Kane ka jingpynpaw kala mih shi sngi hadien ba kawei ka kot khubor ha ka ri ne National Newspaper, kala ai nam ia ka jylla Meghalaya kum ka“crime prone” ne ka jaka kaba jia khah khah ki kam runar, haba thoh khubor shaphang ka jingjah klep jong ki arngut ki shi kurim kiba na Madhya Pradesh, kiba la leitkai sngewbha sha Sohra, kaba dei ka jaka kaba pawnam ha ka kam jngohkai.
Haba iakren bad ki nongpathai khubor, u President ka MTDF u Bah Larsing Sawian ula ong, “Ngi kwah ban phaikhmat sha kawei ka jingthoh lyngba ka artikil kaba long kaei kaei kaba ym sngewtynnad kaba la mih ha kawei ka kot khubor jong ka ri hynin ka sngi, ha kaba ia ki jak alum ki jong ngi kila shah ai nam kum ki jaka kiba jia khah khah ki kam runar. Mynta kane ka jingpynpaw, ka long kaba sngewkhia jur bha namar la pynman ia ka jylla Meghalaya ne iaka ri lum Khasi kadei ka jaka kaba jia khah khah ki kam runar bad kadei kaei kaei kaba ialam bakla bad kaba dei ban pynrem jur”.
“Baroh ki tip, ba ngi dei ka imlang sahlang kaba ieid ia ka jingsuk bad ki shnong ki thaw ki jong ngi. Ngi ngeit ha ka jingpdiang ia ki nongjngohkai bad kam shym la don satia kano kano ka jingjia pyrshah ia kino kino ha kaba iadei bad kiba wankai sha ka jylla Meghalaya” ula ong bad ka bynrap “Katei ka jingkynthoh ka pyni ia ka Meghalaya kum ka jaka ka bym biang bad ka bym iahap bad ngi shim ia kane ka kabu ban kyrpad ia kiba pynmih ia ka khubor, ka lad pathai khubor kaba la pynmih ia katei ka artikil ba kin ai ia ka jingpynshai halor katei ka mat kaba kila leh, namar kum katei ka jingkynthoh kan ktah jur bhai a ka roi ka par ka ba iadei bad ka kam jngohkai ne ban don ia ka jingskhem jingmut ha kaban iwer shuh shuh ia ki briew ban wan ban jngoh ia ka Meghalaya.”
Haba pynpaw ia ka jingsngewkhia halor katei ka jingjia u Bah Sawian ula ong, “Ka long kaei kaei kaba sngewsih ba haduh mynta ka sngi, ym pat lah ban lap satia ia kitei ki shi kurim bad ngi kyrmen skhem ba lyngba ka jingwad yn lah ban lap noh iaki ba ki don ha ka jingshngain bad ka jingbha jingmiat”.
Ula ong ba ka Meghalaya kadei ka jylla kaba la kiew shaphrang kum ka jaka jngohkai khamtam ha kine ki 10 snem kiba la dep bad khamtam eh ha kine ki 5 snem kiba la dep. Ki thain kum ka Sohra, Dawki bad South Khasi Hills baroh kawei, kila kiew shaphrang bad ka kam jngohkai ha ki thain nongkyndong kadei ka khana halor ka jingkiew jong ka kam jngohkai.
“Ha ka jingshisha, kiba bun ki briew kiba wan sha Meghalaya ki jied ban leit sha kitei ki jaka ban ia kaba leit sha Shillong bad kane kadei ka jingshisha ia kaba ngi don mynta. Kane ha kawei ka lynti kala wanrah ia ka jingkylla ha ka ioh ka kot ha ki thain nongkyndong jong ka Meghalaya bad ki briew jong ka Khasi Hills bad Meghalaya kila pdiang ia ka kam jngohkai namar ba ngi iohi ba kadei ka kabu na ka bynta ki paid trai shnong bad ia ki briew kiba ioh ia ka lad ban kamai kajih bad ka tyllong jong ka jingkamai jakpoh na kane ka kam”.
Ula ong ba ka thain shatei lammihngi jong ka ri India kala kiew bha ha ka liang ka ioh ka kot kum ka thain ha ka roi ka par.
U Bah Sawian ula ong, “Ngi don ha ka bynta kaba long kongsan bha jong ka khana jong ka jingkiew irat ka ri ha kaba ka ioh ka kot bad ka jingiadei jong ka thain North East bad ka South East Asia bad kiwei pat ki jylla ri thor jong ka ri India, ka long kaba kongsan bha na ka bynta ban kyntiew ia ka ri ban ban don ia ka jingiadei bad ka ri kaba khraw ka jong ngi”.
Ha kaba iadei bad ka jingshah thombor kaba la jia ha Pahalgam, ula ong ba ki don ki bor kiba kwah ban pyntroin ia ka jingkiew jong ka ri bad kine kila trei ruh ban pyntroin ia ka ri ha ka por ba ngi la lah ban jam shakhmat ia ka ri Japan kaba dei ka ri kaba wan balai ha ka pyrthei ha kaba iadei bad ka GDP.
Haba kyntu ia ki lad pathai khubor ha ka ri, u President ka MTDF ula ong, “Ka khana jong ka jingkiew ka roi ka par ha ka thain shatei lammihngi kala sdang bad kala iaid shakhmat bad kala nang kiew bad kadei kane ka por ba ngi kyntu ia ki lad pathai khubor ka rib a kin long kiba don ia ka jingkitkhlieh ha ka rukom pathai khubor ka jongki ha kaba iadei bad ki khubor na ka bynta ka thain shatei lammihngi”.
“Ngi long kiba kloi ban pdiang ia kino kino ki jingkynthoh kaba ngi dei ban hok, ngi kloi ruh ban rah ia ki kti jong ngi lada ka don kano kano kaba ngi dei ban pynbeit, hynrei ban pynmih ia kaei kaei ka bym shisha ha ki National Media ban shon na ka bynta ki nongpule na ka bynta kiwei pat kiba don ha kane ka ri, kidei kiei kiei kaba ngim lah ban kotbor kum ka thain, ngim lah ban kotbor kum ka ri bad kumta, ngi shim ia kane ka kabu ban kyrpad ia ki National Media ym tang ban shu thaw pynheh ia ki khubor khlem ka jingshisha bad sngewbha ban sngewthuh ruh ba ngi kwah ia ki khubor kiba long shisha ba kidei ban mih na kane ka bynta jong ka ri” ula ong bad ka bynrap “Ngi shim ia kane ka kabu ban kyrpad ia ki National Media ban sngewbha ban peit ia ka thain North East na man la ki liang kat kaba ki lah, ban long kiba khuid ba suba ha ka rukom ai khubor ka jong ki bad ban iatreilang ban ialam shakhmat ia ka Meghalaya bad ia ka thain shatei lammihngi ha ka lynti kaba dei khamtam eh ha kum kine ki por”.
