Guwahati, Iaiong 27: Ka Chakma Development Foundation of India (CDFI) ka la kyntu ia u Myntri Rangbah (CM) ka Arunachal Pradesh u Pema Khandu ba un ym leh ia kino kino ki kam banbein pyrshah ia ki kynhun bynriew riewlum kiba dei ki Chakma bad ki Hajong da kaba shim ia ki kum ki poiwir.
Ka CDFI ka la pynbna ia kane ka jingkyrpad ha ka prokram aijinghikai ban rakhe ia ka ‘national Panchayati Raj Day’ ha Itanagar ha kaba sdang jong kane ka taiew.
Na ka liang u Khandu u la pynbna ba hadien ba la pynbeit ia ki kam iakajia pud hapdeng ka Assam bad ka Arunachal, un weng ia ki jingeh jong ki Chakma bad ki Hajong da kaba phah noh ia ki sha kiwei pat ki jylla namar kine ki jaidbynriew riewlum ki dei ki poiwir bad kim lah ban shongduh hapoh ka jylla ia kaba la aijingiada kum ka jylla jong ki trai shnong hapoh ki riti synshar khadar ne constitution.
“Ki Chakma bad ki Hajong ki dei kiba la pynkynriah da ka sorkar India, kata da ki bor sorkar barim jong ka North Eastern Frontier Agency (NEFA), naduh ka snem 1964 ter ter, bad kito kiba la kha hapoh ka NEFA / Arunachal Pradesh la shim ba ki dei ki nongshong shnong jong ka ri India naduh ba kha ia ki.Kim don kino kino ki kyndon hapoh ki riti synshar ri ki ban aibor ia kano kano ka jylla bad ka UT ban pynbna ia ngi ba ngim dei ki nongshong shnong bad ban weng jubor ia ngi na ki jaka puta ki jong ngi,” ong u nongseng jong ka CDFI u Suhas Chakma.
Pule lang ia kane: Ujor ka NHPF ia ki arngut ki nong Assam ba kynnoh thok pisa ia ki paidbah
Kum ban shu kdew ki don haduh kumba 65,000 ngut ki trai shnong riewlum kiba dei na ka jaidbynriew Chakma bad Hajong hapoh Arunachal Pradesh kiba la phet krad na East Pakistan (mynta ka Bangladesh) bad ia kiba la pynkynriah da ka sorkar pdeng shapoh ka North East Frontier Agency (NEFA) bha katei ka por ha u snem 1964 khnang ban pynkhlain ia ka jingpahara hadien ka thma India China ha u snem 1962.
Nalor kata u la ong ruh ba kiba bun na kito kiba la phet shnong noh ha ki snem 1964-1969 ki la khlad noh mynta, bad ia kito kiba dang im yn ym lah ban weng noh na ka jylla katkum ka hukum jong ka iingbishar Supreme Court ha ka jingshim bishar ka jong ka ha ka snem 1996, kata ha ka mukotduma ka NHRC pyrshah ia ka jylla Arunachal Pradesh.
“Kam don ruh kano kano ka kyndon hapoh ka constitution ka ban pynpaw ba ka Arunachal Pradesh lane kiwei pat ki jylla kum ki jylla jong ki trai shnong riewlum, bad katkum ka Article 371(h) jong ka Constitution ka la shu ai ia ka jingkitkhlieh bad ka bor kaba kyrpang ia u Lat ka Arunachal Pradesh,” ong shuh shuh u Suhas.
Pule lang ia kane: Dawa ka KSU ban weng noh ia ki shipai BSF na shnong Amlarem
