Shillong, Lber 17 : Ka Jaintia National Council (JNC) kala kyntu ia ka Bharatiya Janata Party (BJP) Meghalaya ba kan buddien bad ka Sorkar Pdeng na ka bynta ka “small-scale scientific coal mining policy” ia ka Meghalaya, haba pynksan ba ka kyndon 100-hectare kam long kaba lah ban treikam ha ka rukom bat jaka ki riewlum ka Jylla.
Ha ka dorkhas bala aiti ha u President ka BJP Rikman Momn ha ka sngi Ba-ar, ka JNC kala ong ba u Myntri Rangbah Conrad K Sangma ula tynrong ia ka jingbahkhlieh ha ka Sorkar Pdeng, kumta kala wan iakren ia ka party kaba ialam ia ka Sorkar Pdeng.
“Namar kane, ka JNC kala wan iakren bad ka BJP, kaba ialam ia ka Sorkar India, ba kan shim ia ka policy kaba rai halor kane ka kam kaba ktah ia ka kamai kajih ki hajar longiing ha ri-lum Jaintia” ong u President ka Council Sambormi Lyngdoh ha ka kyrwoh.
U iathuh ba ka seng kala kyrpad ia ka party (BJP) ba kan phah ia ka dorkhas ka seng sha ka Ministry of Mines bad ka Ministry of Coal, ka Sorkar India, ba kan bishar kyrkieh bad ban wanrah ia ka policy kaba donkam.
Ka JNC ka ban jur ia ka jingdawa ban weng noh lane pynkylla ia ka kyndon “100-hectare jong ka Standard Operating Procedure (SOP)” hapoh ka Mines and Minerals (Development and Regulation) Act, 1957, ka bym lah ban leh bad bym iahap bad ka rukom bat jaka jong ki riewlum ka Jylla.
“Ka Council ka kwah ban don ka policy kaba ithuh ia ki jaka kiba rit ba aipateng ki kpa tynmen bad ban shah ia ka jingtih par kat kum ka ain na ka bynta ki nongshongshnong” ong u Bah Sambormi.
Ka mat ba kongsan ha kane ka dorkhas ka dei ka jingdonkam ba kyrkieh ia ka “”comprehensive Geological Ground Survey” ia ki jaka kiba don dewiong ha Meghalaya.
Na ka liang u Rikman Momin ula pynpaw ba ki mat bala pynsngew da ka JNC ki long kiba kongsan bad ba dei hok shisha bad kular ba un sa iakren ia kane ka kam kham kloi kat kaba lah bad ki riew sted ain ka BJP Meghalaya State Unit.
Ula pyntip ruh ba un sa rah iakren shen ia kane ka kam bad ka Sorkar Pdeng bad pyntip ba un sa khot ia ka jingialang bad ka Council ban iakren bniah ia kane ka kam.
 kala kyntu ia ka Bharatiya Janata Party (BJP) Meghalaya ba kan buddien bad ka Sorkar Pdeng na ka bynta ka “small-scale scientific coal mining policy” ia ka Meghalaya, haba pynksan ba ka kyndon 100-hectare kam long kaba lah ban treikam ha ka rukom bat jaka ki riewlum ka Jylla.){kind=link}