Shillong, April 15: Ka Hynniewtrep Youths’ Council (HYC) hynne ka sngi Baar, kala leit iakynduh bad aiti ia ka dorkhas ha u Assistant Inspector General of Prisons uba long ruh u Member Secretary jong ka Prison Recruitment Board ban kyrpad ban shah ia baroh ki samla kiba lah aplai na ka bynta ki kam bapher bapher kiba la pynbna naduh u snem 2019 ba kidei ban iohlad ban iashimbynta ha ka jingshah thungkam.
Ha ka dorkhas ka HYC kala pyntip ha une u ophisar, ba ka Board kala khot ia ka aplikeshon na ka bynta ban pyndap ia ki post bapher bapher lyngba ka Advertisement Memo. No. PRI.8/2019/36 kaba la pynmih ha ka 1 tarik u Naiwieng 2019.
Halor katei ka jingpynbna, bun ngut ki samla kila aplai ia ka kam ha ki kyrdan ki bapher bapher ha kaba kila aiti ia ki aplikeshon bad kila siew ruh ia ka pisa kumba la bthah ha ka advertisement.
Hynrei la pyntip sha ka seng, ba ka Board kam shym la shim ia kino kino ki lad ban pynlong ia ka Physical Efficiency Test, Written Examination ne Interview na ka bynta kitei ki post haduh mynta bad kane kala ktah jur ia ka jingmut jingpyrkhat bad ia ka ioh ka kot jong ki samla kiba la aplai ia ka kam. Kane ka jingpynslem kala lam ruh sha ka jingeh kaba khraw ia ki samla kiba la aplai ba kin heh ka rta ka jongki.
Ha katei ka jingiakynduh bad u Member Secretary, la pyntip ba ka jingslem kadei namar ka jingbym lah ka Board ban thung ia ka kynhun ne ka Service Provider ban pyntreikam ia ka TRP (Transparent Recruitment Process) bad ka jingpyniaid ia kane ka kam halor katei ka bynta kala sdang iaid bad yn sa pyndep noh shen. Kumta ka jingthung kam na ka bynta ki post bapher bapher kumba la kdew ha ka advertisement yn sa pynlong noh shen.
Ka HYC kala kyntu ia u Member Secretary ban pynthikna ba baroh ki samla kiba aplai na ka bynta ki post bapher bapher katkum ka advertisement kidei ban ioh ia ka lad ban iashimbynta lang ha ka jingshah thung kam bad ban pyndep ruh ia kane ha ka por kaba biang khnang ba kan ym ktah ia ka lawei jong ki samla bad ia ka lad iohakm iohjam.
Ka HYC kala ong, ba kan dang iai buddien halor kane ka mat bad kala byrngem ruh ba kan shim da ki sienjam kiba tyngeh lada ka Borad ka dang iai pynslem ia kane ka kam.
 hynne ka sngi Baar, kala leit iakynduh bad aiti ia ka dorkhas ha u Assistant Inspector General of Prisons uba long ruh u Member Secretary jong ka Prison Recruitment Board ban kyrpad ban shah ia baroh ki samla kiba lah aplai na ka bynta ki kam bapher bapher kiba la pynbna naduh u snem 2019 ba kidei ban iohlad ban iashimbynta ha ka jingshah thungkam.){kind=link}