Shillong, Lber 18: Ka Federation of Khasi Jaintia and Garo People (FKJGP) kala kyntu ia ka sorkar jylla ban wad ia ki lad ki lynti ban pyllait noh ia ka ram kaba la shim da ki nongrep, kaban long ka jingiarap ban weng ia ka jingeh ka jong ki.
Ha ka shithi kaba la phah sha ka Myntri kaba khmih ia ka rep ka riang ka Kong Ampareen Lyngdoh ha ka sngi Baar, u President ka FKJGP Mawkynrew circle u Shakanstar Mynsong ula ong ba ki nongrep ka Mawkynrew bad Mawryngkneng Block kila mad ia ka jingeh namar ka jingbym lah ban siew ia ka ram namar ka jingkylla ka suinbneng ha kaba ki jingthung jingtep kila iap lut namar ka jingduna slap.
“Kumta ngi kyntu ia ka sorkar jylla ban wad ia ki lad ki lynti ban pyllait noh ia ka ram, kaban iarap ia ka jingeh kaba mad da ki nongrep” ula ong.
Ka FKJGP kala pynpaw ruh ba ka jingbym ioh ia ki sboh dawai bad ka jingpulom ka sorkar ban ai ia ki symbai lyngba ka tnad bad ka jingslem ban pyllait ia ka jingiarap sha ki Producer Group (PG) wat hadien ba kila rejistar la palat ia ka shi snem kala ktah jur bha ia ki nongrep ha ka jylla.
“Halor katei, ngi kyrpad ia ka tnad ban shimkhia mardor ban pynbeit ia kine ki jingeh” la ong u Mynsong.
Sa kawei pat ka mat kaba ka seng kala pynpaw ka kynthup ia ka jingdonkam ban sam ia ki spray pump, ki symbai high yielding variety, ki jingai jingtip shaphang ki skhim bapher bapher ia ki nongrep bad ban pynkloi ka jingai jingiarap pisa ia ki nongrep kiba la shah ktah na ka jingpynjulor ka mei mariang.
 kala kyntu ia ka sorkar jylla ban wad ia ki lad ki lynti ban pyllait noh ia ka ram kaba la shim da ki nongrep, kaban long ka jingiarap ban weng ia ka jingeh ka jong ki.){kind=link}