Shillong, Naiwieng 4: U Director General ka Assam Rifles u Vikas Lakhera u la ban jur ia ka jingdonkam ban pynneh pynsah ia ka jingshngain bad ia ka jinglong kyntang jong ka khappud Indo-Myanmar, ban pynkhreh ia ki jingjia ba kyrkieh bad ruh ban weng ia ka jingeh ha ka liang ka kam pahara.
Ia kane u la kren ha ka jingialang jong ka Assam Rifles Inspector General’s Conference 2025 kaba la pynkut ha Headquarters Directorate General Assam Rifles ha Laitkor, Shillong ha ka sngi ba-ar.
Ha kane ka conference la wan ban ia shim bynta da ki ophisar rangbah, ba kynthup naduh ki Formation Commanders, Battalion Commanders bad ki Staff Officers.
Ha kane ka conference la pynleit jingmut bha ia ka jinglah jong ka kynhun shipai bad ka jinglah ban iakhun pyrshah, da kaba ia kren ruh halor ka jingioh ia ki tiar iakhun bad ki tiar kiba thymmai.
U Lieutenant General Lakhera u la ai khublei ia ka kynhun shipai na ka bynta ka jinglong bad jingtreikam jong ki hapoh ki jaka ba kynduh bad shem jingeh, da kaba pynpaw ia ka jingdonkam ban bteng ban peitngor ha ka jinglong jingman.
Kane ka conference ka la ai ka lad ban iasam ia ki rukom treikam kiba bha tam, ki jinghikai ba la ioh, bad ban pynkhlain ia ka jinghikai bad jingkyntiew ban pynroi ia ka sap jong ki shipai.
Ia kane ka conference la pynkut da ka jingkular kaba thymmai ban pynneh ia ka jinglong ba la pynkhreh ha ka jingtreikam bad ban ialeh ban long kiba tbit ha baroh ki liang, ha kaba ki nongwan ia shim bynta ki la kular ban pynneh ia ka jingsuk bad jingkmen ha la ki jong ki bynta ne ki thain ba ki don ia ka jingkitkhlieh.
