Shillong, K’lyngkot 23 : U President barim ka NCP bad MLA ka Gambegre Saleng A Sangma hynne ka sngi nyngkong, ula kynnoh ia u Dr Mukul Sangma ba u dei u “Khawpud” namar ka jingieh ia ka Congress bad leit pyniasoh sha ka All India Trinamool Congress (AITC).
“U (Dr Mukul) dei u khawpud. Um lah ban iai neh bad ka Congress, ta ka daw ula ieh ia ka Congress bad pyniasoh sha ka TMC” ong u Saleng haba iakren bad ki nongthoh khubor hadien ka jingleit iasoh bad ka Congress hangne.
Une u MLA ka Gambegre ula kynnoh ruh ba dei u Dr Mukul ula kynjat ia u shabar jong ka Congress. “Hynrei, ki briew kiba kynjait ia nga mynta kim don shuh hangne…ta ka daw nga la wan rung biang” ula ong.
Haba kylli, u Saleng ula ong ba u don ia ka mynsiem ialeh ban neh ha ka Liang Pyrshah ha ka por ba u dei u MLA shimet ha ki san snem bala leit noh.
“Peit mynta ia u Dr Mukul Sangma bad ka kynhun jong u..Ki dei ki Congress hynrei balei kim lah kyrda ban neh ha ka kynhun ha kine ki san snem. Kaei kaban jia ia ki lada ki long kumba long manga?. Hato kin don kiba nud ban neh marwei ha ka Liang Pyrshah haduh san snem kynthih?” ula kylli.
Ha kawei ka liang, u Saleng ula ong ba um kwah satia ban iasoh sha ka BJP namar um kwah ban pynmong ia ka jingsngew jong ki paidbah kane ka Jylla Khristan kum ka Meghalaya.
