Shillong, Rymphang 26: U National President ka National People’s Party (NPP) bad Myntri Rangbah ka Jylla Conrad K Sangma hynne ka sngi Balang, u la ong ba ka NPP ka la kut jingmut ba kan iai trei shitom ban kyntiew bad ban ioh shuh shuh ia ka jinshaniah na ki paidbah ha baroh ki Constituency jong ka Jylla.
Ïa kane u Conrad u la ong hadien ba ka NPP ka jop haduh 13 Seat ha Jaiñtia Hills Autonomous District Council (JHADC) hynrei ka la lah ban jop tang 4 Seat na ki 29 tylli ki constituency ha Khasi Hills Autonomous District Council (KHADC).
“Ngi pdiang ia ka rai jong ki paidbah. Ngi hap ban peit bniah ialade bad ngi hap ban trei shitom bad ngi hap ban pynkhlain ia ka jingtreikam jong ngi ha kawei pa kawei ka constituency. Ngin sa shong ia ka jingialang ban iakren ia kine ki mat baroh bad kumno ban pynbha ia kiei kiei hynrei ha ka liang jong ngi, ngi sngewkmen ba ngi ioh thaw ia ka EC ha Jaintia Hills” ong u Conrad.
U Conrad u la ong ba ka Party ka la khmih lynti ba kan leh kham bha shibun hapoh ka thain Khasi Hills hynrei watla kata ka la leh bha lada ia nujor bad ka ilekshon MP.
“Haka jingshisha ngi la kyrmen ban ïoh bun Seat ha Khasi Hills hynrei kam shym la urlong. Kumba nga la ong nga la ïohi ïa ka jinglong jingman bad ka jingioh vote ka NPP kala kham kiew ha kane ka ilekshon shaki District Council lada ïa nujor bad ka ilekshon MP ba dang shu dep” u la ong.
U Conrad u la ong ba ka ilekshon ha Jaintia Hills ka la long kaba eh bha hynrei ka NPP kala ioh ka jingjop ban ioh thaw EC wat hapdeng ki jingeh bad kane ka long ka khubor ba bha iaka Party.
“Nga don ka jingkyrmen ba ha kine ki bnai bad ki snem ban wan, ngin sa lah ban pynbha ïa ka jinglong jingman jong ka Party kynthup ha Khasi Hills. Nga ai khublei ïa baroh ki MDC, kiba la shah jied kynthup ïa ki kyrtong jong ka party, ngin dang ïai trei bad pynkhlaiñ ïa ka party” u la ong.
Haba iadei bad ka jingshah kynnoh baka NPP ka dei ka Party jaidbynriew Garo, u Conrad u la ong “Ki jingshah kynnoh ki dei kiba shu thaw bad kane ka dei ka bynta jong ka sain pyrthei bad kumba nga la ong lada ka long kumta ngim dei ban jop ia ka Nongpoh, Nongshken bad kiwei kiwei ki constituency bad ngim dei ban jop ha Jaintia Hills hynrei ngi la jop. Hynei haka sain pyrthei kin don beit ki jingshah kynnoh”.
“Kane ka la long ka daw kaba la don bad kaba ki briew ki la ïakren la slem bha bad ngi la ïaid lyngba bun ki ilekshon mynta bad ka la dei ka por ba ki briew ki dei ban puson bha ïa kata ka mat kyrpang. Kumba nga la ong lada kata ka dei ka daw kaba kongsan te nga tharai ba ngin ym jop ha Jaiñtia Hills bad katto katne ha Khasi Hills” u la ong.
U Mynri Rangbah u la kdew ba baroh ki Party ki long kiba kongsan ha ka sain pyrthei bad ka NPP kam shim sting ïa kano kano ka Party.
“Phim lah ban khien sting ïa kano kano ka Party. Wat la ka Congress kam shym la jop hynrei ym lah pat ban shu shim sting ia ka. Na ka bynta jong ngi, ngi kheiñ ïa baroh ki Party kiba kongsan bad ba khlaiñ” u la ong.
Haba ban jur ïa ka jingdonkam ban pynkhlain iaka NPP, u Conrad u la ong “Ngi hap ban trei shitom shuh shuh bad ngi hap ban pynbeit iaki jingduna. Ngi hap ban hiar sha man ki shnong ban pynkhih bad pynthikna kumba nga la ong ngin ym sangeh ban rung shaki shnong ban shngain ka sain pyrthei bad ban pynkhlain iaka Party. Kumta ka kham kongsan ia ngi ban pynleit jingmut ha ka roi ka par bad ha ki bynta ba shah iehnoh bein jong ka imlang sahlang bad ban trei ia kata.”
Haba iadei bad ka ilekshon sha GHADC, u National President ka NPP u la ong “Ngi la ïalam iaka EC ha GHADC mynta la 10 snem tam. Kumta kin don ki jingeh bad ngi hap ban trei shitom. Hooid, ngin ym shim sting ia kano kano ka Party hynrei ka Result jong ka ilekshon hangne kan nym ktah ia ka ilekshon ha Garo Hills. Kan long kaba iapher. Ka dei ka ilekshon district council kumta kin don ki mat district council, ki mat hapoh ka thaiñ bad kin don kiba kham kongsan kiba ktah ïa ka result Garo Hills.”
