Shillong, Iaiong 04: Ka seng National Hynniewtrep People Federation (NHPF) hynne ka sngi Baar, kala kynthoh pyrshah iaka Shillong Municipal Board halor ka jingbuh iaka kor Incinerator kaba don ha Marten, Mawlai khlem da ioh iaka jingmynjur na ki dorbar shnong kiba don ha katei ka thaiñ.
U General Secretary ka NHPF u Bah Uberlin Lyngdoh Sangriang haba iakren bad ki nongthoh khubor ula ong, ka seng kala wad jingtip lyngba ka RTI bad kala shem ba ka jingbuh iaka Incinerator ban tylliat ia ki jaboh jabain kiba mih na ka Bio-Medical Waste ka dei kaba la leh khlem da ioh kano kano ka jingbit ne ki jingthoh bad ka seng ka pyrshah jur ia kane ka jingleh jong ka SMB.
“Ka SMB kam shim la ioh ia kano kano ka jingthoh ne NOC bad kam shym la pynlong ruh ia ka Public Hearing ban buh iaka Incinerator bad ngi la ioh ruh ban iakren bad ki Rangbah shnong kiba don hajan ka Marten ba kim shym la ioh jingtip eiei. Ngi la pan jingtip da ka RTI bad ka SMB kala pynpaw ba kam don ia ka NOC na ka Mawlai Town Dorbar ne na ki shnong kiba marjan” ong u Bah Sangriang.
Ula buh jingkylli ba ha kano ka dur ba ka SMB haba ka khlem ka jingioh jingbit na ki Dorbar Shnong kala buh iaka Incinerator ha katei ka jaka bad ka jingpyntreikam ka sorkar ia katei ka kor ka long kaba be-aiñ.
U Publicity Secretary Bah Damian Passah, ula ong, ba ka seng kala buh jingkylli lyngba ka RTI la ka SMB kala ioh jingbit naka shnong na ka Mawlai Mawiong, Mawlai Nongkwar bad Mawlai Town Dorbar hynrei kim shym la lah ban pyni ba kila ioh ia katei ka jingbit namar ka jingbuh iaka Bio-Medical Waste Treatment ka long kaba ma bha lada ym lah ban tylliat lut ia kitei ki jaboh.
“Kam don ka rukom treikam kaba biang kaba lah ban tylliat thikna ia kitei ki jaboh bad ka jingbuh ia ka Incinerator ka long kaba ma bha bad kan ktah ruh iaka koit ka khiah jong ki paidbah, lada ka rukom tylliat ia ki jaboh kam long kaba biang” ong u Bah Passah.
Ula ong, ka jingtylliat ia ki niut kiba kumne kumtai ruh kam lah bha kumta ban tylliat sa ia ki niut kiba mih na ki jaka sumar kala khia shaba palat bad ka seng ka kyrpad ia ka sorkar ba kan wad jaka noh shawei ban buh iaka Incinerator.
“Ha ka jingleit jurip ka seng iaka Marten, ngi la shem ba ym shim la pyntreikam iaka kor Incinerator namar ki briew kiba pyniaid ia kane ka kor ki shim shuti bad kane ka long kaba sngiew tieng bad kaba sngewma ba ka jingpang ka lah ban saphriang na katei ka jaka kaba buh ia ki Bio-Medical Waste namar kan long bih lada buh da ki taiew ia kitei ki jaboh bad lada ym tylliat noh ia kitei ki jaboh hapoh 48 kynta” ong u Bah Sangriang.
U General Secretary ula ong, lada slap jur katei ka bih ka tuid sha pung Umiam bad wat ki niut kiba lum na ki iing briew ruh kila shlei lypa bad tam ia ka kynroh jongka Marten bad mynta sa na ka Bio-Medical Waste kan pynsniew iaka mariang bad buh ha ka jingma iaka koit ka khiah.
“Kiba bun ki briew kiba trei ha katei ka jaka kila ioh ia ki jingpang kiba bun rukom bad nga iohi markhmat ruh ba kiba trei hangtei kila iap noh namar ka jingktah bad jingsniew jong ka jaboh nangto bad mynta lyngba ka Bio Medical Waste ruh ka jaboh kaba tuid sha Damsite, pyrkhat naka bynta ki briew kiba bam ia kito ki dohkha nangthei bad wat ki shipai ha Rangmen ki tan ia ka um na Umiam bad mynta ia ki shipai kiba iada iaka ri ngi pyndih da ka bih ym shuh da ka um” ong u Bah Sangriang.
