Shillong, Naiwieng 15 : U Symbud Myntri Rangbah ka Jylla Bah Prestone Tynsong hynne ka sngi ba-ar, ula ong ba ki paidbah ka Jylla kim don jingshaniah shuh ia u Myntri Rangbah barim ka Jylla bad nongialam ba mynta ka All India Trinamool Congress (AITC) Dr Mukul Sangma.
U Bah Prestone ula kren ia kane haba kynthoh ia ka jingkynnoh jong u Dr Mukul Sangma, ba ka Sorkar Meghalaya Democratic Alliance (MDA) ba ialam da ka National Peoples Party kam don satia ia ki skhim ba kham pher kabym mih naka Integrated Basin Development and Livelihood Promotion (IBDLP).
Haba kynthoh ia kane, u Bah Prestone ula ong “ Ai ba u Dr Mukul un kren katba u mon, namar ngim don eiei ban kynthoh ia kane bad nga tip bha ba ki paidbah kim shaniah shuh ia u”.
Ula pynkynmaw ruh ba une u Myntri Rangbah barim u ruh ula sam ia ki masi bad ai song pisa ba T. 5000 sha kawei pa kawei ka longiing ha u snem 2007 shuwa ka elekshon bad ong “ Ha ka jingshisha, nga nud ban ong ba ka long ka jingleh kaba bakla bha. Namar kata, nga tharai ba phi dei ban kylli ia kane na u Dr Mukul Sangma”.
U Bah Prestone ula kam ba ka skhim bala wanrah da ka Sorkar MDA kala ai jingmyntoi bha ia ki paidbah ha kylleng ki jaka jong ka Jylla bad ong “Kaei kaba ngi leh mynta la ka dei ka Focus ne ka Prime, ngi la leh bha bad ki paidbah kiba ioh ia ki- la ki dei ki SHG ne ki Cooperative Society, kila ioh jingkyrkhu na kine ki skhim”.
Ha kajuh ka por, u Symbud Myntri Rangbah ula ong ba u Dr Mukul Sangma ula long Myntri Rangbah ka Jylla haduh phra snem hynrei u khlem lah ban pyndep ia ki project kiba kongsan jong ka Jylla, kiba la sahteng da ki phew snem.
“U Dr Mukul ula long Myntri Rangbah la phra snem. Sngewbha kylli na u ba ha ka por jong u, balei ba u khlem lah ban pyndep ia ka Crowborough Hotel ?. Hood ki don shibun ki jingtynjuh hynrei haba kut hi, ka Sorkar hapoh ka jingialam jong u Conrad K Sangma bad ka Sorkar MDA kala lah ban pyndep ia ka” ula ong.
Haba pynbna ba shen ka Sorkar kan sap lie noh ia kawei pat ka project bala sahteng la slem bha- ka Mariot Hotel ha Jail Road, u Bah Prestone ula pynkut da kaba ong “Kane kan sa jia mynta u bnai. Ai ba un kren kat kaba u sngew bit hynrei ka jingshisha hi ka long ba kane ka Sorkar ba mynta kala lah ban pyndep ia ki project ba sahteng ha Jylla”.
