Shillong, Iaiong 04: U Nongaiktien ka seng NPP u Bah Himalaya M Shangpliang hynne ka sngi Palei ula kyntu ia ka seng Voice of the People Party (VPP) ban sangeh shi syndon ban pynbiej paidbah halor ka ktien Hindi.
“Mano ba la pynpaw ia ka jingpyrshah ia ka ktien Hindi hapoh ka ïingdorbar thawaiñ ka jylla? Hato kam dei ka VPP? Mynta haba kila shah kynthoh halor kane, kila sdang mynta ban thet kti da kaba ong ba katei kam dei satia kano kano ka ishu” ong u Bah Shangpliang.
U Bah Shangpliang ula kynthoh ia kane ban pynshai ia ka jingkren jongu Nongaiktien ka VPP Bah Batskhem Myrboh.
“Hapoh iingdorbar, phi (VPP) ong ba ngi pyrshah Hindi hynrei ban ioh khring ia ka vote (bar jylla), phi ong ba ngim ju pyrshah ia ka ktien Hindi. Ka jingpyrshah ka VPP ia ka Hindi hapoh Assembly ka dei kaba la buh rekod ha ka jingpyniaid ia ka iingdorbar, kumta ki dei ban sangeh noh shi syndon ban pynbiej paidbah bad ban ong ba kan dei satia ka ishu” ong u Nongaiktien ka NPP.
Halor ka jingkam ka VPP ba ka Blueprint ka jong ka kan dei kaba iaid katkum ki kyndon aiñ, u Bah Shangpliang ula ong, ka jingshisha ka long ba ka Blueprint jong ka VPP ka dei tang ka kot sada.
“Kim don satia ia kano kano ka jingiohi jngai na ka bynta ka jylla” ong u Bah Shangpliang bad ula kyntu ia ki paidbah ba kim dei ban ngop ha ki jingpynbiej jong katei ka seng saiñ pyrthei.
 ban sangeh shi syndon ban pynbiej paidbah halor ka ktien Hindi.){kind=link}