Guwahati, Rymphang 15 :Ka kynrum kynram ka la mih ha Maharashtra hadien ba kawei ka advertisement jong ka sorkar Assam ka la kam ba ka ‘Bhimashankar Temple’ ia kaba la shim ba kadei ka jaka lehniam jong u Blei Shiva (Jyotirlinga) kaba hynriew napdeng ki khatar tylli ki jaka lehniam kaba don hapoh Assam.
Ha ka jinglehniam Mahashivratri, la pyllait ia kane ka advertisement da ka tnatTourism Department ka sorkar Assam lyngba ki lad pathai khubor bapher bapher ha ka 14 tarik mynta u bnai.
Katkum katei ka advertisement ka sorkar Assam la ong ba ka temple Bhimashankar kaba ha Pamohi ka jngai tang kumba 18 km na ka lynti surok Guwahati Airport bad ka don ha trai jong u lum Dakini hapoh ka jylla Assam.
Na ka liang u CM ka Assam u la kyrpad ia ki nongwan lehniam ba kin ia mih paidbah sha ka prokram ba la pynlong shibynta jong ka jinglehniam Mahashivratri lyngba katei ka advertisement.
“Ia wan sha Dakini Parbat, Kamrup, ka jaka lehniam kaba hynriew ha India’.Ha kane ka juh ka advertisement la pynpaw ruh ia ka list jong ki jaka lehniam bapher bapher.Ha kane ka advt la kdew ruh kum ka Bhimashankar ha ‘Dakini’ hadien ka kyrteng jong ka Bhimashankar.Nalor kata ha kane ka advt la iohi ruh ia ka dur jong u CM ka Assam u Himanta Biswa Sharma.”
Hadien ba kane ka advt ka la saphriang sha ki paidbah, na ka liang ka Congress ha Maharashtra ka la pyrshah jur bad kynnoh ia ka sorkar BJP halor ka jingleh politik lyngba ka temple kaba dei ka jaka lehniam jong ki paidbah Hindu mynta lah da ki spah spah snem.
U nongialam ka party u Sachin Sawant u la ong ba haduh mynta kiwei pat ki sorkar jylla jong ka seng BJP ki dang iai bteng ban knieh ia ki kynhun bei tyngka na Maharashtra, bad pat ka la don ka jingpyrshang ban pyndonkam sa ia ki jaka lehniam.
“Ka sorkar BJP ka kwah ban bat ia ki jaka lehniam ba pawkhmat ha ryngkat bad ki kam karkhana hapoh Maharashtra.Ngi pyrshah jur ia kane ka jingleh jong ka sorkar BJP ha Assam.U la dawa ba ka sorkar jong u Shinde Fadnavis ha Maharashtra kan pynshai mardor halor kane ka mat bad ban pynrem ia katei ka kam leh beain jong ka Assam,” pynpaw u Sawant lyngba ka twitter.
Ka Bhimashankar Temple ha Pune district kaMaharashtra ka dei ka jaka lehniam ba pawnam napdeng ki 12 tylli ki temple jong u Blei Shiva hapoh ka ri.Kane ka jaka lehniam ka don ha ka jaka lum kaba dang bun ki khlaw ha ka jaka kaba don ia ka tyllong jong ka wah Bhima.
