Imphal, Risaw 18 : Ka liang pyrshah Congress bad kiba bun ki kynhun seng, kaba kynthup ia ka Indigenous People’s Association of Kangleipak (IPAK), kila kynthoh tyngeh ia ka sorkar Manipur ba la lamkhmat da ka BJP halor ka polisi jong ka sorkar ban pynduh ia ki jingmyntoi na ka bynta kito ki longiing kiba don khun palat ia ka saw ngut.
Ka kynhun myntri ka sorkar Manipur ba la lamkhmat da u Myntri Rangbah (CM) N. Biren Singh ha ka 13 tarik mynta u bnai kala shim ia ka rai ban pyrkhing ha kaba iadei bad ka jingdon khun sha ka sawngut na ka bynta kawei ka longiing khnang ba kin ioh ia ki lad ha ki kam sorkar lane kiwei pat ki jingmyntoi nalor ki skhim bapher bapher.
Ka kynhun myntri ha ka jingialang kaba la long ha ka sngi Palei ba la lah kala mynjur na ka bynta ban pyntreikam ia ka Manipur State Population Commission.
Na ka liang ka Vice President ka Manipur Pradesh Congress Committee ka K. Tilotama kala ong ba kane ka jingshim rai jong ka sorkar Manipur ban pynduh ia ki jingmyntoi na ka bynta ki longiing kiba don palat sawngut ki khun ka long ka jingleh kaba khlem pyrkhat bad kaba long pyrshah ia ki riti synshar khadar jong ka ri.
“Ka jingshim rai jong ka sorkar BJP kam long kaba shai bad ka jinglong jingman kaba la pynlong ia ka sorkar ba kan shim ia kaba kum kane ka rai ka long ka bym lah ban mutdur,” ong ka Tilotama lyngba ki lad pathai khubor.
Nalor kata kala ong ruh ba kane ka polisi jong ka sorkar kan pynkhein ruh ia ka hok ban im bad kan pynkhein ruh ia ki kyndon ain kiba iadei bad ki riti synshar khadar jong ka ri.
Ka sorkar Manipur ka lah ban shim ia kane ka rai khnang ban tehlakam ia ka jingkiew ha ka jingbun paid, bad kala kyntu ruh ia ka sorkar ba kan bishar bniah halor ka jingwan tuied jong ki poiwir ia kiba ym shym la pyrkhing ha ka jaka ban pynleit jingmut halor katno ngut ki longiing ki don khun don kti.
Na ka liang ka seng IPAK kala pynpaw ba kane ka polisi ka dei kaba khlem da pyrkhat sani bha bad ka ban ktah jur ia ki trai shnong riewlum ka jylla kiba la rit paid lypa.
Ka IPAK kala ong ruh ba ka India ka dei ka ri kaba wan ba ar ha ka jingbun briew ha ka pyrthei bad kaban kylla long ruh kaba bun brie tam ha ka pyrthei ha kane ka khana samari ka ban wan.
“Ha India ka jingdon jong ki nongshong shnong kiba dei ki Meetei ka long tang 0.09 percent ia kaba lah ruh ban ong ba kadei ka kynhun nongshong shnong kaba rit paid tam,” ong shuh shuh katei ka kynhun.
Ha ki jylla kum hapoh Bihar, Uttar Pradesh bad Delhi, ka jingdon briew kala long kaba palat hapoh ka ri, bad kumta ruh ban shim ia kiba kum kitei ki sienjam ban tehlakam ia ka jingkha khun ka long kaba lah ban pdiang, hynrei kalong kaei kaei ka bym sngew iahap ban pyntreikam ia kane ka polisi hapoh Manipur, ong shuh shuh katei ka kynhun seng.
Ka IPAK kala ong ruh ba katba ka jylla kala sakhi halor ka jingduna jong ki nongshong shnong kiba dei ki trai shnong, ka jingwan buhai shnong da ki briew kiba na shabar kalong kaba shyrkhei.
Haduh mynta hi, kawei na ka lai bynta jong ki nongshong shnong ka jylla ka dei kaba la iakhleh lang bad ki briew kiba na bar, bad hapdeng kane ka jinglong jingman ka jingshim ia kaba kum katei ka rai ban pyrkhing ha kaba iadei bad ka jingdon khun tang sha ka sawngut kalong kaba sngew bynniaw shibun, ong ka kynhun.
Shuh shuh kala ong ruh ba kane ka jingshim rai jong ka sorkar kadei ka jingdon ia ki jingthmu kiba hapoh na ka bynta ban pynduh jait ia ki trai shnong riewlum ka jylla.
