Itanagar, Risaw 29 :Ka Seng Adi Bane Kebang (ABK) kala kynthoh tyngeh ia ka kynhun seng lehnoh Manipur Naga Revolutionary Front (MNRF) bad ia ka Peoples’ Liberation Army (PLA) halor ka jingkam thok ha kaba iadei bad ka jingdonkti ha kaba siat pynhap ia ka liengsuin helicopter jong ka tnat shipai Indian Army hajan Tuting hapoh Arunachal Pradesh kaba la jia ha ka 21 tarik mynta u bnai.
Haba aijingkren ha ka jingialang bad ki lad pathai khubor ha ka sngi Palei ba la lah, u nongaiktien ka ABK, u Vijay Taram u kam ba ka jingpyllait khubor lyngba ki Whatsapp bad lyngba ki lad pathai khubor kiba la shim ia ka jingkam jong ka MNRF bad ka PLA halor ka jingdonkti ha kaba siat pyniap ia katei ka liengsuin shipai kalong ka bym shisha.
“Ki jingkam jong kitei ki kynhun kieng atiar ki dei ki bym don nongrim bad kiba shu thaw, bad na ka liang ka ABK ka kyntait ia kiba kum kine ki khubor kiba ialam bakla halor kiba kum kitei ki jingjia ba sngewsih,” ula ong shuh shuh.
Ha kajuh ka por ula kyntu ruh ia ki lad pathai khubor ba kim dei ban pynshlur ia kiba kum kine ki khubor khlem da lap ia ki jingshisha.
“Ki nongshong shnong na ka jaidbynriew Adi kin ym lah ban shah ia kino kino ki kam ialeh pyrshah ri hapoh ka jylla, khamtam hapoh ka thain ba shong shnong da ki jaidbynriew Adi.Nalor kata ym shym la don satia kino kino ki kynhun seng lehnoh hapoh ka thain Upper Siang district,” ong u Taram.
Nalor kata ula kam ba ki nongshong shnong Adi ki ai ka jingkyrshan kaba pura ia ka tnat shipai Indian Army kaba la pahara ia ki jaka khappud ka jylla mynta lah bun phew tylli ki snem.
Lah ban kdew ba katei ka liengsuin helicopter ka Indian Army kala mih na Likabali hajan khappud ka Assam hadien ba kala hap noh ha ki bynta jong ka thain Migging, shathie ka Tuting hapoh Arunachal Pradesh ha ka step jong ka 21 tarik mynta u bnai.
Ka jingwad ia katei ka liengsuin kala kut noh ha ka 22 tarik kaba bud hadien ba la lapdien ia baroh ki metiap jong ki san ngut ki dkhot ka tnat shipai.Ka tnat Indian Army kala pyllait ruh ia ki kyrteng jong kine ki riewshlur ryngkat ki dur ki jong ki ia kiba la ithuh kum u Maj Vikas Bhambhu, Maj Mustafa Bohara, CFN Tech AVN (AEN) Aswin K V, Hav (Opr) Biresh Sinha, NK (Opr) Rohitashva Kumar.
