Ki Myntri Sorkar ne MLA ki lah ban buh tang kawei ka kali tah iit iong
Shillong, Nailur 06: U Superintendent of Police (SP) ka East Khasi Hills u Bah Sylvester Nongtnger hynne ka sngi, u la kyntait iaka jingkynnoh u President ka Voice of the People’s Party (VPP) bad MLA ka Nongrem Bah Ardent Miller Basaiawmoit, ba ki Pulit kila bat iaka kali jong u ha ka jingtalasi ia ki kali tah iit iong.
Haba kren sha ki lad pathai khubor u Bah Sylvester Nongtnger u la iathuh ba ha ka 22 tarik Nailar haka por kumba 11:30 ki Pulit ka tnat Traffic ka Mawlai, kila pynlong iaka jingtalasi paidbah (random checking) iaki kali ba tah iit iong ha surok kum shi bynta ban pyntreikam iaka hukum jong ka Iingkashari Supreme Court.
“Hapdeng ka jingtalasi paidbah, la wan kawei ka kali Toyota Fortuner bad ki Pulit ruh ki pynsangeh iaki kali katba wan hynrei da ki la talasi pat la tip ba kadei ka kali Jong u Bah Ardent bad mar kumta hi, khlem da pynslem ki la pynlait noh khlem talasi ia kane ka kali u MLA” ong u Bah Sylvester Nongtnger.
U la bynrap daka ba ong “Kaei kaba mih haki rynsan ‘Social Media’ ba shah talasi ka kali u MLA kam dei satia ka jingshisha namar ka dei ka jingtalasi paidbah bad haba don ka jingtalasi, lada ki kali na shakhmat kila sangeh, ki kali shadien ruh kila sangeh lang namar ba kawei ruh ka dei namar ka surok kaba rit”.
U SP u la ong ba kane kam dei tang ka jingtalasi kyrpang iano iano hynrei kadei ka jingtalasi paidbah (random checking) ym tang iaki kali riewshimet hynrei wat ki kali Sorkar (ML 01) ruh kila ngat lang.
Une u Heh Pulit u la iathuh ba kat kum ki jingbthah jong ki bor ba halor, baroh ki Myntri Sorkar bad ki MLA ki don iaka hok ban buh tang kawei ka kali tah iit iong.
“Ka lah don ka jingbthah najrong ba, baroh ki MLA bad ki Myntri Sorkar kid ei ban phah iaki Number Plate jong ki kali sha ka tnat kam pohiong bad kane ka tnat kan sa phah shaka ki Pulit ban leh ia kaba donkam” u la ong.
Haba kylli halor ki riewshimet kiba tah iit iong, u SP ka East Khasi Hills u la ong “Ki riewshimet, lane mano mano ruh lada ki sngew ba ki donkam ban tah iit iong, ka la don ka Committee naka Sorkar kaba lah ban rai, mano kita kiba don hok ban tah iit iong”.
U SP u la kubur ruh ba yn ym lap kawei ruh ka kali Pulit hapoh East Khasi Hills kaba tah iit iong.
 ka East Khasi Hills u Bah Sylvester Nongtnger hynne ka sngi, u la kyntait iaka jingkynnoh u President ka Voice of the People’s Party (VPP) bad MLA ka Nongrem Bah Ardent Miller Basaiawmoit, ba ki Pulit kila bat iaka kali jong u ha ka jingtalasi ia ki kali tah iit iong.){kind=link}