Shillong, Naitung 08 : U Myntri Khynnah ka Ministry for Minority Affairs George Kurian ha ka sngi Nyngkong, ula kyntait ban ai jubab ia ka jingkylli ba balei u Myntri Rangbah Duh ka Ri Narendra Modi, u kiar ban leit iuhkjat sha Manipur kaba don ha ka thma iapher Jaidbynriew.
“Peit ha Iingdorbar Parliament, u Myntri Rangbah Duh ula ai jubab ia ka jingkylli halor kane ka kam. Ngam kwah ban ong eiei palat ia kata” ong u Kurian haba iakren bad ki nongthoh khubor ha ka jing wan sha Ophis ka BJP ha Jylla.
Haba kylli, ula ong “Nga la ai ka jubab. Nga la iathuh ba u PM ula dep batai ia kane ha Parliament bad ngam kwah ban ong eiei shuh palat ia kaba ula kren”.
Ha kawei ka liang, u Kurian ula ong ba u khmih lynti ba ka nam jong ka BJP ha Meghalaya kan sa nang kiew kumba long ha kiwei pat ki Jylla hapoh ka Ri.
“Tad haduh u 2017 ha Tripura, kane ka dei ka kyndon. Ngi la ioh duna bha ki vote bad ngim la ioh ia ka jingbun paid hynrei hadien ka elekshon, ngi la thaw ia ka Sorkar da ka jingbun paid. Kane ka dei ka nongrim ba ka BJP kala nang kiew ha Ri India. Kumjuh ruh, ha u 1999 ngi la ioh haduh 96 seat bad u PM Atal Bihari Vajpayee ula shong ha shuki tang 30 sngi bad ha u 1998 ula wan biang kum u Myntri Rangbah Duh, bad hadien kane ula wan phai biang ha u 2004” ula ong.
