Shillong, Nohprah 22 : U National President ka NPP bad Myntri Rangbah ka Jylla Conrad K Sangma hynne ka sngi palei, ula kyntait war ba ka NPP kala tyrwa pisa ia u Nongialam ka PDF bad MYntri Sorkar Bah Banteidor Lyngdoh (Paidang) ba un wan pyniasoh noh sha ka NPP hashuwa ka elekshon MLA-2023.
Ula kynthoh ia kane halor ka jingkam jong u Bah Paidang ba ula kyntait ia ka jingtyrwa pisa ba T. 5 klur ban iasoh sha ka NPP.
“Kane ka jingkam kala mih na u (Banteidor), nga hi ngam tip bad ngam don jingtip ia kane bad kat kum ka jingtip jong nga hi kane ka dei kaba bakla” ong u Conrad haba iakren bad ki nongthoh khubor.
U Conrad ula ong ba ki nongialam bad kiwei ki briew kila wan pyniasoh sha ka NPP namar kila iohi ia shibun ki kam pynroi kiba la jia hapoh ka Jylla ha kine ki saw snem shiteng.
Hapoh ka jingialam jong ka NPP, u Conrad ula kam “Ha kine ki san snem, ym don surok kiba la shna ban ia ki 20 snem bala leit noh. Ki kam iakajia pud kiba la shu ieh lah shimkhia ban pynbeit mynta, ki Nongrep bad ki Self Help Group kila ioh ia ki jingiarap ym kumba ju ioh baroh shi katta. Ki youth programme ki bym ju don mynshuwa, ban iarap ia ki samla ha ki sap ba ki don kynthup ki jingialehkai kumka Meghalaya Games bad kiwei ki programe kum ka NEOG kila wan ha Jylla mynta”.
“Kine ki dei ki kam kiba la khring ia ki Nongialam kiba la wan pyniasoh mynta bad ba dang kwah ruh ban wan iasoh namar kila iohi ia ka jingioh jingkyrshan jong ka Party katba nang mih ki snem. Kila iohi ruh ba ka Party kala ai ka jingshakri kaba bun bah.. Hooid ki dang don shibun kiba hap ban leh…ngim ong ba ngi la leh lut ia kiei kiei baroh hynrei ngi la iaid ha ka lynti ban pynurlong ia kata” ula ong.
Haba pynpaw ia ka jingsngewskhem ban ioh ia ka jubab ba biang na ki paidbah ka Jylla ha u 2023, une u Nongialam ka NPP ula ong “Ngi khmih lynti ba ki paidbah kin ai ia ka rai ba kham khlain shuh shuh sha ka NPP ba kan ioh ban synshar marwei ha ka Sorkar”.
Halor ka jingkynnoh pyrshah ba ka NPP kala pyndonkam bakla ia ka skhim FOCUS bad FOCUS+, u Myntri Rangbah ula ban jur ba ki briew ki lah ban kynthoh kat kaba ki mon hynrei ka jingshisha hi ka long ba kine ki prokram ki dei kiba la pyntrei kam ha kine ki arsnem bala leit noh ha kylleng ki jaka jong ka Jylla.
“Ka FOCUS bad FOCUS+ ka dei kaba la sdang ha u 2021 bad kala iaid la arsnem mynta. Namar kata, kam dei shuh ka skhim ba thymmai, kala dep iaid bad bun ki briew kila ioh jingmyntoi na kane ka skhim hynrei lada don ki briew kiba kwah ban pynkylla kam sain pyrthei ia ka, nga hi ngam don eiei ban ong eiei ia kata. Hynrei kane ka dei ka prokram bad ka skhim kaba ngi hap ban iaid kat kum ki kyndon bad lada phi iaid kat kum kine ki kyndon, phi long kiba ibit ban ioh ia ki jingmyntoi” ula bynrap.
