Shillong, Rymphang 26 : U Myntri Rangbah ka Jylla Conrad K Sangma ha ka sngi Palei ula kyntait ia ka jingkam ka Liang Pyrshah ba ki prokram aikam aijam jong ka Sorkar kila pulom, haba ban jur ba laba phai sha ka jingdon paid ki samla ha Jylla, ka dawa ia ki lad jingiarap kiba neh bad ki skhim kum ka FOCUS bad CM-Elevate kila pyni ia u soh.
Haba jubab ia ki jingkylli u MLA ka TMC Dr Mizanur Kazi, ba ka jingbym iohkam iohkam ki samla kala kiew namar ka jingpulom ki Policy, u Conrad ula ong “Ban shu pynkut baki policy ki pulom ka long ka bym dei satia. Lada phi khmih ia ka survey, ki iapher-6.0 ha u 2022-23 bad 6.2 ha u 2023-24 ha ka periodic labour force survey bad 3.1 ha ka CMIE estimate. Kine la pynshong nongrim na ki samla ba ki nombor ki lah ban iapher.
Ula pynpaw ia ki sienjam bala shim da ka Sorkar ban pynpaw ba haduh 3.66 lak ki kam la lah ban pynmih ha kine ki khyndiat snem bala leit.
“Lehse ngim pat lah ban pyndep pura ia ka thong, hynrei ka dei ka kam kaba dang iaid bad ngi la don ha ka lynti kaba dei” ula ong.
U Myntri Rangbah ula ban jur ba ki paid nongshongshnong ka Meghalaya ki bun ki dei kiba dang khynnah. “Kumba 50% na ki nongshongshnong jong ngi ki dei kiba hapoh 20 snem. Ngam ai daw satia, hynrei dei ka jingsngewthuh ia kine ki jingeh, ngi hap ban wanrah kham bun ki prokram ban lah ai kam lyngba ki mission bapher bapher”.
Halor ka FOCUS scheme, u Conrad ula iathuh ba T.140 klur lah dep ban ai sha ki 22500 ngut ki kynhun nongrep, kaba pynmyntoi ia 2.1 lak ngut ki briew, katba ka FOCUS + kala poi sha ki 1.5 lak ki nongioh jingmyntoi. “Ki nongrep kila ioh jingmyntoi bha. Kiba bun na ki,kila ai sakhi ba na ka pisa ba ki ioh, ka jingpynmih mar jong ki kala kham bun. Ngin nang pynthikna ia ki jingktah ba kham bun ha ki snem ban nang wan” ula bynrap.
Haba kylli halor ka jingioh ia ki scheme ban sengkam lajong, u Conrad ula kdew ia ka CM-Elevate, ka flagship progam ka Jylla kaba kyrshan ia ki nongsengkam, ka kam jngohkai, kam ialehkai, ka bha ka miat bad kiwei kiwei ki jait kam.
“Tang hapoh 20 sngi, ngi la ioh pdiang haduh 22,000 ki aplikeshon- Lah bun palat haduh ba ngi hap ban khang shipor ia ka portal. Ki briew ki lah ban aplai lyngba ka Meghalaya One Portal” ula ong.
Halor ka jingtreikam digital jong ka Employment Exchange, ula jubab ba ka Sorkar kala nang jam shakhmat ha baroh ki bynta jong ka jingshakri ban pyndonkam noh da ki kordigital bad kala shim ruh ia ka sienjam ban pyntreikam noh da ki kor digital ha Employment Exchange ruh.
“Nga kular ia ka Iingdorbar ba ki skhim bad ki prokram kin sa nang iarap kham bun ha ki sngi ban wan nang” pynkut u Conrad.
