Kyntu ia kawei ka Kot Khubor ban wad jingtip bha
Shillong, Nohprah 28: U Myntri Rangbah ka Jylla Conrad K Sangma, ula kyntait ia ki jingkam jong kawei ka kot Khubor phareng ba kynnoh ba ka Sorkar Jylla ka don jingthmu ban thied helicopter.
Kat kum ka khubor ba pynmih da ka The Shillong Times, la kynnoh ba ka Sorkar Jylla kala pyllait ia ka tender ban thied ia ka helicopter ban shakri ia ki Heh VIP.
U Myntri Rangbah ula ong ba kam don satia kata ka jingpyllait tender ba kum kane ka jingthmu namar ka jingrem dor ban thied kat ia ka helicopter nalor ka jinghap pynlut bad sumar ia ka.
“Kane kam dei ka sien nyngkong ia kane ka kot khubor..sa shisien ki khlem leh ia ka home work” ong u Conrad haba ai jingpynshai ia kane ka khubor.
Kat kum ka jingong jong u, ka Sorkar ka ju pyllait ia ka tender tang ban shu shim wai ia ka helicopter kata ruh ka shong ha ka jingpyndonkam ia ka bad siew ruh kat kum ka jingiaid ka kynta (hour basis). Kane ka dei kaba biang eh ban lait na ka jingpynlut kaba bun.
“Kane ka kot khubor ka dei ban thoh ia ka jingshisha…bunsien ki ju thoh ia kaba bakla..dang shen ruh kila thoh ba don ka jyrsieh ba T.1300 klur hapoh ka Tnad Tourism hynrei hadien la shem ba dei tang T.13 klur bad kam don hi ruh ka jyrsieh” ula ong.
“Ban shu thoh khubor tang ban pynshit paidbah kumne ka lah ban khring tang shisngi bad katba ki dang leh kumne, nga thikna ba ki paidbah kin sa duh ka jingshaniah ia kum kane ka kot khubor kaba pynmih ia ki khubor lamler” ula bynrap.
U Conrad ula kyntu ia kane ka kot khubor ba kam dei ban pynmih ia kum kine ki khubor tang ban shu pynthohbria ia ka Sorkar, kaba dei ka kam ka bym dei.
Haba kylli, u Conrad ula ong ba u ieh ha ka tnad DIPR bad ka tnad ba dei khmih ban khmih la ka donkam ne em ban ujor pyrshah ia kane ka kot khubor da ka mukotduma bai pynmynrain khmat.
