Shillong, Naiwieng 29: U Myntri Rangbah ka Jylla Conrad K Sangma ha ka sngi Balang, ula kyntait ia ka jingkam jong ka North east Petroleum Mazdoor Union ba ki Pulit kila lehdonbor bad pyndik ia ki nongniah bad nongbud jong ki kali kit umphiang petrol ba diesel ba wan sha Jylla.
Haba iakren bad ki nongthoh khubor, u Conrad ula ong ba kane ka dei ka jingsngewthuh bakla suda bad ki Pulit kila leh iala ka jong ka kamram ban pynthikna ba ki mar kiba la mang ban poi sha ki jaka ba thmu ban pynpoi, kin poi beit thik shispah na ka shispah kumba dei ban long.
U Myntri Rangbah ula pyntip ba ula ioh pdiang ia ki jingujor na ki trai jong ki petrol pump ba ki don ki kali kit umphniang kiba wan pynpoi petrol/diesel sha ki petrol pump, kila die tuh ia ki umphniang ha shiteng lynti bad khleh pat ia ka umphniang da ka um ban pyndap ia ka.
“Ka dei halor ki jingujor, ngi lah pynlong ia ka jingtohkit. Halor ka jingtohkit, ki Pulit kila ioh sabut bad ki jingshisha halor kane ka jingleh beain ki kali kit umphniang” ula ong haba bynrap “Dei namar kane, ki Pulit kila shim ia ka sienjam ban leh eiei bad lehse katto katne na ki nongkhaii kim sngewtynnad satia ia kaei kaba jia bad ta ka daw kala mih kane ka jingpyrshah”.
U Myntri Rangbah ula iai ban ba haba don kum kine ki kam bym hok, ki Pulit bad ki bor district kin leh eiei beit ha kaban pynthikna ba kum kine ki kam kin ym dei ban jia satia.
