Guwahati, Lber 03: U Chancellor ka University of Science & Technology, Meghalaya Mahbubuk Hoque ula kyntait ia ki jingkynnoh bam pisa bad ban jur ba haduh 80% na ki samla pule ki ioh ban rung klas ei hapoh ka “Visson 50”, ka skhim bala wanrah ban kyrshan ia ki samla pule na ki longiing ba duk ha ka thain Shatei Lam Mihngi.
“Ka Vision 50 kam dei ka kam kamai pisa hynrei ka dei shibynta jong ka Mission ka ERD Foundation ban btin lynti ia ki samla pule na Nongkyndong. Kam mih satia ka jingkylli ban shim pisa” ong u Hoque haba iakren bad ki nongthoh khubor hadien ba shah pynngat ha ka Judicial custody ha ka Iingkashari Chief Judicial Magistrate ka Sribhumi District ha ka sngi Saitjain.
Ia u Hoque la ialam tian bishar hakhmat ka IIngkashari hadien ba kut noh ka 5 sngi ka Police custody ha ka sngi saitjain. Haba kren halor ki jingkynnoh pyrshah ia u da ka Sorkar Assam, ula ong “Kane ka dei ka kam ain bad yn sa iasaid ia ka hapoh ka Iingkashari”.
Haba jubab ia ki jingkynnoh ba leh thok ha ka eksam, u Hoque ula pynksan ia ka nongrim ka University haba ban jur ba don katto katne ki samla kila pyrshang ban leh thok, hynrei ki Nonghikai ka USTM kila tuklar bad khang lad ia ki. “Ngi dei ban ai khusnam ia ki nonghikai jongngi kiba bat ia ka burom, ym ban kylli jingkylli ia ki”ula ong.
Haba kyntait ban kynthoh eiei halor kane ka case, u Hoque ula ban jur ba kam don satia kano kano ka jingpynhiar kput ia u bad wer sngewbha ia kiba pyrshah ba kin leit jngoh ia ka USTM. “Ym don mano mano ba pynlong sohpdung ia nga. Phi long kiba pdiang sngewbha ba phin wan dalade sha ka University ba itynnad jong ngi” ula ong.
U Hoque bad san ngut ki nonghikai kila shah kem hadien ka ejahar bala mudui da u Circle Inspector ka Patharkandi Revenue Circle kaba kynnoh ba la pynpas ia ki samla pule da kaba shu siew pisa. Kito kiba shha kem ki kynthup ia u Hiramani Saikia (Principal, Central Public School), Vijay Dutta, Rezak Ali, Imdadur Rahman bad Numan Ahmed (teachers).
Ha kajuh ka por, ka Guwahati High Court kan sa ai ia ka hukum halor ka case ba nyngkong pyrshah ia u Hoque mynta ka sngi Nyngkong katba ia ka jingkyrpad bah jamin yn sa shim bishar mynta hi ka sngi.
