Shillong, Naiwieng 05: U Symbud Myntri Rangbah Bah Sniawbhalang Dhar ula kyntait war ia ki jingkynnoh bad jingkam ba ka don ka jingiashrut kaba jur hapdeng jong u bad u Symbud Myntri Rangbah Bah Prestone Tynsong, haba ban ia ka jingialong kawei baroh arngut bad ka jingiatreilang kum ka Kynhun.
Haba kren sha ki lad pathai khubor ha ka sngi Balang, u Bah Sniawbha ula ong ba ki khubor ba ong ba ka don ka jingiashrut hapdeng jong ki ka long ka bym don nongrim satia bad dawa ia ka jingpanmap na ki lad pathai khubor ba pynlait ia kane ka khubor ba bakla.
“Ngi iatylli bha, ngi long kawei” ong u Bah Sniawbha haba bynrap ba ma u, Bah Prestone bad u Myntri Rangbah Conrad K Sangma, kila iatreilang hapdeng ka jingjai jai.
Ula niew ia ka Sorkar NPP kum ka “Iing kaba heh bad ba kmen” bad ka bym don jaka ia ki jingiashrut.
Halor ka jingantad ia ka rukom sam ticket na ka bynta ka elekshon 2028, u Bah Sniawbha ula ong ba ka dang kloi palat ban iakren ia kane ka kam bad ka jingpynleit jingmut ka dei ban long ha ka roi ka par ban ia ka kam politics ia mynta.
“Kane kam dei ka por ban iakren shaphang ki ticket, ngi dang don sa arsnem shiteng ban leit sha ka elekshon” ula ong haba bynrap ba kam don hi ruh kano kano ka jingthmu ban pynduh ticket ia ki MLA ba mynta.
U Bah Sniawbha ula pynpaw ia ka jingsngewskhem ba ka NPP kan nang lehbha shuh shuh bad ong ba ka Party ka don jing kyrmen ban ioh ia ka single majority ha u snem 2028, kaban pynkhein ia ka record kumba la leh ha ki snem bala leit.
“Ym pat ju don ki party ba ioh haduh 33 ngut ki MLA, tang ka NPP. Ngi ju pynkhein ia ki record bad ngin sa pynkhein biang ha u 2028 da ka jingioh ia ka single majority” ula ong.
