Kyntait u Bah Prestone ba iashrut bad u Bah Sniawbha | Dei ka khubor lamler ki seng shim kabu

Shillong, Naiwieng 05 : U State President ka National Peoples Party (NPP) bad Symbud Myntri Rangbah Bah Prestone Tynsong ula kyntait war ia ki khubor ba ka don ka jingiashrut hapdeng jong u bad u Symbud Myntri Rangbah Bah Sniawbhalang Dhar, haba ong ba kine ki jingkam baroh ki dei ki jingmutdur jong ki seng sain pyrthei kiba don jingthmu sha lyndet.

Haba kren sha ki nongthoh khubor ha ka sngi Balang, u Bah Prestone ula pynpaw ia ka jingkyndit halor ki khubor bas a phriang ha ki social media bad katto katne ki kot khubor bad electronic media, bad ong ba kam don jingshisha satia ka jingkam ba ka don ka thma pohiing kaba jur hapdeng jong u bad u Bah Sniawbha.

Haba niew ia kane ka khubor kum ka khubor thok, ula ong “Ai ba ngan pynshai sha phi mynta ka sngi ba kane kam dei satia kaba shisha bad nga sngew ba kane ka dei ka khubor lamler lane lehse u briew ba thoh ia kane u dei uba la shah pyndonkam bakla da kino kino ki briew ne kino kino ki seng sain pyrthei ba kwah myntoi…ia kane tang u Blei uba tip”.

Ula kyntu ia ki lad pathai khubor ban pynshisha ia ki jingshisha hashuwa ban pynmih ia kum kine ki khubor, haba maham ba kane ka lah ban wanrah ia ka jingkulmar jingmut hapdeng ki paidbah.

“Nga kyntu ia u briew ba pynmih ia kum kane ka jingthoh bad kum kane ka khubor ba kin pynshisha shuwa ba kin pyllait sha u paidbah namar ki jingpynkulmar jingmut kila shu jia kha ma kha . La ka dei ki briew ba don ha ki lad pathai khubor, la ki dei ki briew ha ki seng sain pyrthei ne kino kino ki kynhun ba ki dei, nga sngew ba ngim dei ban leh politics ba jaboh lane thoh ia kine ki khubor jaboh” ula ong.

U Bah Prestone ula ban jur ba ha ka iing jong ka NPP, ka party ka niew ia baroh ki dkhot kum ki shiiing shisem bad ki pynbeit ia kino kino ki kam lyngba ka jingiakren.