Shillong, Lber 22 : Ka Bharatiya Janata Party (BJP) kala kyntait ban ai ticket ia baroh ki kyrtong kiba kwah iakhun ia ka elekshon Lok Sabha 2024 ha Meghalaya kynthup ia u Myntri Sorkar Bah A.L.Hek bad rai ban kyrshan tylli ia ka National People’s Party (NPP) ba kan ioh ia ka jingjop.
Ia kane la pyntip da u Nongaiktien ka BJP na Delhi Sambit Patra uba la ong ba kat kum ka jingbthah jong u National President JP Nadda, ka BJP kan kyrshan ia ki kyrtong ka NPP ha Meghalaya – Shillong bad Tura Parliamentary seat.
As per the instructions of the Hon’ble National President of @BJP4India, Shri @JPNadda ji, I am pleased to inform that BJP will extend its support to Lok Sabha Candidates of NPP in both the seats of Meghalaya (Shillong and Tura),
to NPF in the Outer Manipur Constituency and to…— Sambit Patra (Modi Ka Parivar) (@sambitswaraj) March 22, 2024
Lah ban kdew hangne ba ka BJP-Meghalaya kala dep phah haduh 11 tylli ki kyrteng sha Delhi, kiba kwah ia ka ticket jong ka BJP ban iakhun ha ka elekshon Lok Sabha ha Shillong bad Tura Parliamentary seat.
Napdeng kine, 5 ngut ki dei kiba la phah kyrteng ia ka Shillong seat bad 6 ngut ia ka Tura Parliamentary seat.
Ki 5 ngut kiba la phah kyrteng ia ka Shillong seat ki kynthup ia u Myntri Sorkar Bah A.L.Hek, ka Dr Fenela Lyngdoh Nonglait, u President barim ka BJP Bah Ernest Mawrie, u President ka BJYM Mewaker Lyngdoh bad Sumitra Laloo.
Ia ka Tura seat, kiba pan ticket ki kynthup ia u MDC ka Tura Bernard N Marak, u MLA barim Winnerson D Sangma bad KC Boro, u MDC barim Boston Marak, Ria Sangma bad Thomas Marak.
Haba pyntip ia ka rai jong ka BJP sengkmie, u Sambit Patra ula thoh ha Twitter “Kat kum ka jingbthah u National President ka @BJP4India, Shri@JP Nadda Ji, nga sngewbha ban pyntip ba ka BJP kan ai ka jingkyrshan ia ki kyrtong ka NPP ha baroh artylli ki seat ka Meghalaya (Shillong bad Tura)”.
Haba pynthikna ia kane, u President ka BJP-Meghalaya Rikman G Momin ula ong ba kane ka rai ka dei kaba la shim ha ka jingialang jong ka NDA kaba la pyniaid da u Myntri Rangbah Duh ka Ri Narendra Modi ha Delhi hynne ka sngi.
“U PM ula rai ban burom lang ia ki paralok ka NDA bad kumta la shim ia kane ka rai” ula ong.
Ka NPP kala pynieng ia ka MP ba mynta Agatha K Sangma na Tura bad ka Myntri Sorkar Kong Ampareen Lyngdoh na Shillong Parliamentary seat.
Haba kylli, u Rikman ula ong ba ka BJP Meghalaya kan hap ban bud kat kum ka rai jong ki Nongialam na Delhi.
Ha kajuh ka por, u Rikman ula pyntip ba un sa pynlong ia ka jingialang jong ka party lashai ka sngi.
Ula pyntip ruh ba ka BJP kan kyrshan ia ka NPF ha ka Outer Manipur constituency bad ia ka NDPP ha Nagaland ha kane ka elekshon Lok Sabha 2024.
Lah ban kdew ba ka Bharatiya Janata Party ka dei ka paralok ba iatreilang hapoh ka Sorkar MDA-2 ba ialam daka NPP ha Jylla Meghalaya.
 kala kyntait ban ai ticket ia baroh ki kyrtong kiba kwah iakhun ia ka elekshon Lok Sabha 2024 ha Meghalaya kynthup ia u Myntri Sorkar Bah A.L.Hek bad rai ban kyrshan tylli ia ka National People’s Party (NPP) ba kan ioh ia ka jingjop.){kind=link}