Shillong, Jylliew 22 : Ka seng ki nongkhaii bad nongdie syiar hapoh ka kynhun All Meghalaya Poultry Supplier and Retailer Association hynne ka sngi Palei, kala pynshai ba kam shim la don satia ka jingpang ki syiar ha ka jylla kumba la don kiba pynsaphriang ia ki khubor thok ha ki Social Media.
U President ka AMPSRA Bah Wanshai Kharchandy haba iakren bad ki nongthoh khubor ula ong hadien ba kala don ka jingpynsaphriang ia ki khubor thok ha ka Social Media ba ki syiar kila iohpang bad kan buh ha ka jingma ia ki nongbam.
“Ka seng kala leit mardor ban iakynduh ia ki Doctor jong ka tnad Animal Husbandary and Veterinary jong ka jylla bad kane ki doctor kila pynthikna ba kam shym la don satia kano kano ka jingpang ki syiar ha ka jylla” ong u Bah Wanshai.
Ula ong ba ki briew kila shu shna thok ia ki dur ki dar bad pynsaphriang ia ki khubor ba ki syiar kila iohpang bad kane kala pyntieng bad pynsyier iaki paidbah ban bam ia ka doh syiar.
Ula iathuh ba ka seng kala leit iakynduh ruh iaki pulit ka Lumdiengjri Police Station ban shimkhia lem halor ka jingpynsaphriang khubor thok ban pyntieng ne pynsyier iaki paidbah.
Ula ong ba ka seng ka sngew ruh ba dei ban pynshitom ia ki briew kiba donkti ha kaban pynsaphriang ia ki khubor lamler ki bym don satia ia kano kano ka jingshisha.
Ula pynshai ruh ba ka jingkiew ka dor jong ka doh syiar kadei namar ba ka don ka jingduna ha ka jingshalan iaka syiar bad kadei ruh namar ba ka Assam ka khang iaka jylla West Bengal ban khaii ia ki syiar bad ki nongkhaii syiar kila hap ban thied noh ha ka dor kaba rem.
Pule lang ia kane: Shong jingialang u CM bad ka MoRD ban bishar ia ka jingtreikam ki skhim ha Jylla
