Shillong, Rymphang 19 : U Chief Secretary ka Jylla Meghalaya Bah DP Wahlang ha ka sngi Balang, ula kyntait war ia ka jingkam jong u Myntri Rangbah ka Assam Himanta Biswa Sarma ba kynnoh ba ki degree ba ai da ka University of Science and Technology Meghalaya (USTM) ki dei kiba thok.
Ula ong ba ki degree bala ai da ka USTM ki dei kiba ieng kat kum ka ain.
Haba kren sha ki nongthoh khubor, u Bah Wahlang ula ong “Ka USTM ka dei ka university ka Jylla. La thaw ia ka kat kum ka ain bala mynjur da ka Iingdorbar Thaw Ain ka Jylla. Ki degree jong ka, ki dei kiba la ithuh da ka UGC. Kumta, ka jingkylli kam mih sati aba kin dei kiba thok. Ka dei ka University ba shisha bad la kyrshan ia ka da ka Sorkar Meghalaya”.
Kane ka jingkynthoh kala mih kum ka jubab ia ka jingkynnoh ba dang shen jong u Myntri Rangbah ka Assam Himanta Biswa Sarma, kaba la mih ha ka 16 tarik Rymphang.
U Himanta ula kynnoh ia ka USTM ba la leh shibun bah ki kam thok, ai ia ki degree thok bad pyniaid bakla ia ka pisa tyngka. Ula kam ba ia ki PhD degree la shu die, ki eksam ki bym lah ban shaniah bad kiwei kiwei.
U Myntri ka Tnad Pule Puthi Rakkam A Sangma dang shen ula ong ba u Myntri Rangbah ka Assam u dei ban ai ia ki sakhi satar kiba khlain hashuwa ban pynmih ia kum kine ki jingkynnoh.
Ula ong, katba baroh baroh ki lah ban kynnoh kat kaba ki mon hynrei ki jingkynnoh ki dei pat ban kyrshan da ki sakhi.
