Shillong, Nailur 21 : Ka Sorkar Jylla ha ka sngi Palei, kala kyntait ban pdiang ia ka jingdawa jong ka Liang Pyrshah ban mynjur da ka Resolution ha kaban pyrshah ia ka Uniform Civil Code (UCC) halor ka nongrim ba ka Sorkar Pdeng kan dang ban wanrah ia ka Bill halor kane ka kam.
Ia ka Resolution ban pyrshah ia ka UCC la wanrah da u MLA ka Congress na Mawhati Bah Charles Marngar bad bala kyrshan da ki Dkhot ka All India Trinamool Congress (AITC) bad ka Voice of the People Party (VPP) ha Iingdorbar Thaw Ain.
Haba jubab, u Myntri Rangbah Conrad K Sangma ula ong ba ka Sorkar Jylla ka pyrshah eh ia ki jingthmu bad jingmut jong ka UCC namar ka iaid pyrshah ia ka nongrim jong ka ri India kaba shongshnong da bun jait ki jaidbynriew.
Hynrei, ka Sorkar kam lah ban shu mynjur ia ka Resolution dang mynta khlem da tip shuwa ia kiei ki mat kiba don ha ka UCC Bill.
“Ka jingkylli ka mih ba hato ngi kum ki Nongthaw Ain ngi lah mo ban pyrshah ne mynjur ia ka Resolution khlem da tip ia kiei kiba don ha ka UCC Bill. Shabar ka Iingdorbar, ngi lah ban kren halor ka nongrim kaba ngi iasngew ia kaei kaban jia hynrei kum ki nongthaw ain, mynta lada ngi dei ban pyrshah ia ka UCC, kaba nyngkong eh ngi donkam ban ioh hakhmat jong ngi ia ka UCC Bill” ong u Conrad.
Ula ong ba kane kam mut ba tang namar kiwei ki Jylla kila leh, ka Meghalaya ruh ka dei ban mynjur lang ia ka Resolution. “Ta ka daw, ngi hap ban pyndonkam ia ka jabieng. Namar kata, kan dei tad hadien ba ngi la iohi ia ka UCC Bill, ngin sa lah ban shim ia ka nongrim kum ka Sorkar” ula ong.
Nalor kane, u Myntri Rangbah ula kular ruh ba ka Iingdorbar kan ieng iatylli kawei ban pyrshah ia kano kano ka sienjam jong kino kino kynthup ka Parliament ban pyntroin ia ka snap kyrpang, ka hok bad ka riti ka dustur jong ki trai paid riewlum ka Jylla Meghalaya.
