Kyntait ka Sorkar ia ka jingdawa ka MCTODA ban ai kajuh ka dor kamai shabar u pud ka Jylla

Shillong, Naiwieng 05 : Ka Sorkar Jylla kala phah ktien ia ka jingbym lah ban pyntreikam ia ka jingdawa jong ka seng Meghalaya Commercial Truck Owners and Drivers Association (MCTODA) ban ai kajuh ka dor kamai ia ki trok kit dewbilat bad clinkers shabar u pud u sam ka Jylla Meghalaya.

Haba kren sha ki lad pathai khubor ha ka sngi Balang, u Symbud Myntri Rangbah ka Tnad Transport Bah Sniawbhalang Dhar ula pynshai ba ka Sorkar Jylla kala pynbna ia ka dor kamai hapoh u pud u sam ka Meghalaya hynrei kam lah ban pyntreikam lang ia kane kajuh ka dor sha kiwei ki Jylla kum ka Assam.

Kane ka jingkren jong u ka mih hadien ka rai jong ka MCTODA ban pynbteng ia ka jingiakhih, bad pynsangeh ia ka jing kitia ka dewbilat bad clinkers.

Kane ka Seng kala iakhih halor ka jingiapher ha ka dor kamai, da kaba ong ba ka dor ba buh hapoh Meghalaya ka dei T.9 katba shabar ka Jylla, kala hiar sha T.5, ka jingiapher ka bym sngew lah pdiang satia.

U Bah Sniawbha ula pynpaw ba katto katne ki seng kila dawa ba ki karkhana dewbilat ki dei ban siew ia ka dor bala pynbna da ka Sorkar, ia kaba ki karkhana kila pyntreikam ia ka.

Kat kum ka jingong jong u, artylli ki Seng na East Jaintia bad West Jaintia kila iatreilang khlem ka jingthut bad ki karkhana dewbilat, kila pdiang ia ka dor kamai bala buh da ka Sorkar. Hynrei, ka MCTODA kala dawa ia kajuh ka dor kamai ba dei ban pyntreikam lang shabar u pud ka Meghalaya, ka bym iahap satia namar ka hap shabar u pud u sam ka Jylla.

U Bah Sniawbha ula pyntip ba ka dor kamai bala buh da ka Sorkar hapoh Meghalaya ka long T. 11 shi metric ton ha ka shi kilometer kiba iaid na ki surok bala siang rong, T.12 shi metric ton haka shi kilometer ha ki surok ba shu siang maw bad T. 14 shi metic ton ha ka shi kilometer ha ki surok khyndew. Ki karkhana dewbilat kila pyntreikam ia kine ki dor bala buh, ula bynrap.

Haba kylli, u Symbud Myntri Rangbah ula ong “…ka Sorkar Jylla kam lah ban buh ia ka dor kamai na ka bynta kiwei pat ki Jylla, kum ka Assam”.

U Bah Sniawbha ula khot iakren ia ki Seng trok ba kin wan iakynduh ia u kum u Myntri ka Tnad Transport, hynrei ula ban jur ba kane ka kam ka dei ka kam hapdeng ki karkhana dewbilat bad ki kali ba kit mar.

“Kane ka dei ka kam hapdeng ki karkhana dewbilat bad ki kali kit mar bad kam dei satia ka kam jong ka Sorkar” ula pynpaw.

Haba kren halor ka jingjia ha Mawryngkneng, u Bah Sniawbha ula pynthikba ba 2-3 ngut ki briew kila shah kem bad ki Pulit kin dang pyniaid shakhmat ia ka jingtohkit bad ban leh ia kaba donkam.