Shillong, K’lyngkot 23 : U Myntri ka tnad Bording Abu Taher Mondal ha ka sngi Palei, ula ong ba kam don satia kano kano ka jingthmu na ka liang jong ka Sorkar ban aiwai noh sha ki kynhun shimet ia ka Meghalaya Energy Corporation Limited (MeECL).
Kane ka jingkren kala mih hadien ba ka kynhun ki Nongialam ka Khun Hynniewtrep National Awakening Movement (KHNAM) kala pan jingpynshai halor kane ka kam.
“Haba phai sha ka jingaiwai noh shaki kynhun shimet ia ka MeECL, ia mynta hi kam don satia kaba kum kata ka jingpyrkhat” ong u Mondal haba iakren bad ki nongthoh khubor hadien ka jingialang.
“Ngi dang trei shitom ban iohi ba ka MeECL kan khie khlieh bad pyllait na baroh ki jingeh ba ka iakynduh bad ka pla tyngka jong ka mynta kala kham biang. Halor ki kam u paidbah haba iadei bad ka jingsam bording, ka jingtan bad jing pynmih bording ruh kala kham khlain khnang ba ka MeECL kan don ha ka jaka kaba biang” ula ong.
U Myntri u pyntip ba ka dei ka jingshisha ba mynshuwa, saw tylli ki sub division la shu ai wai sha ki artylli ki kompani-kawei ka dei ka Chicomputer kaba khmih ia ka Dalu bad ka FEDCO kaba khmih ia ka Phulbari Nangal bad Mawsynram.
“Ia mynta, ka jingtreikam jong ka Chicomputer ka biang bha. Kim don satia ki jingpynsah ia ka jingsiew. Hynrei ngi kham khuslai khyndiat haba phai sha ka FEDCO namar ka pynsah ia ki jingsiew bad ngi la dep phah show cause notice sha u pud ban shim noh da ki lynti ka ain pyrshah ia ki lane ban weng syndon ia ki n aka kam. Baroh kine ki kam kila iaid hynrei kine ki kam ki dei tang halor ka jinglum ia ki bill bording” ula ong.
Haba iadei bad ka kam Smart Meter, u Mondal ula ong ba kane ka dei ka rai jong ka Sorkar Pdeng bad ka Ministry of Power ban ai ia ki smart meter sha baroh ki Jylla bad baroh ki Jylla kila jam shakhmat bad ka project. “Ngi ruh ngi dang bud ia ki jingbthah jong ka Tnad Bording” ula bynrap.
Shuwa kane haba iakren bad ki nongthoh khubor, u Working President ka KHNAM Bah Thomas Passah ula ong “ La pyntip sha ngi ba ka Sorkar Jylla kala jam shakhmat ban aiwai noh sha ki riew shimet ia ka kam pynmih bording hapoh ka Jylla. Ngi tip ba ka Sorkar kala dep aiwai ia lai tylli ki centre. Ngim kwah satia ban aiwai ia baroh ka kam pynmih bording sha ki kompani shimet namar ngi sheptieng ioh ki nongthang bording ka Jylla kin hap mad ia ki jingkit kaba khia ha ka pisa pilain lada aiwai ia ka kam pynmih bad sam bording”.
U Bah Passah ula pyntip ba ka kynhun kala rah iakren ruh ia ka kam ba iadei bad ka dor jong ki smart meter.
