Nongstoiñ, Ïaïong 26: Ka skul Aradonga Secondary (Deficit) School, kaba don ha West Khasi Hills, ha khappud ka Meghalaya- Assam, kat haduh mynta kam pat ju don satia wat tang uwei ruh u Nonghikai ia ka sobjek Khasi ne MIL naduh ba seng ia ka ha u snem 1962.
Kane ka jingbym don nonghikai ia ka sobjek Khasi ha kane ka skul ka dei namar ka daw ka jingsngap mynthi jong ka Tnad Pult Puthi ka Sorkar Jylla, ia ki jingkyrpad jong ki bor pyniaid skul na ka por sha ka por.
Ia ka sobjek Khasi ha kane ka skul, la shu iarap pynshim da uwei u Nonghikai Khasi tang ban ioh ai jinghikai ia ki Khynnah Skul lyngba ka jingkyrpad jong u Headmaster ka skul.
Kane ka jingleh kmienah ka Tnad Pule Puthi ia kane ka skul kala paw pyrthei na ka jinghiar jurip jong ka seng HNYM Umsaitwait bala ialam da u President Fastmanrise Marshillong ryngkat u President ka HNYM Mawshynrut Pyllyn Bah C Sohhang hynnin ka sngi Palei.
Ha ka jingiakren bad ki nongialam ka HNYM, u Headmaster ka skul u Chithung VF Momin ula pynshisha ba ka skul kat haduh mynta mynne, kam ju ju don satia ia u Nonghikai u ban hikai ia ka sobjek khasi.
Une u Headmaster ula pyntip ba ka skul kala dep pyntip bad phah jingthoh jan man ka por sha ki bor khmih ka Sorkar hynrei phewse haduh mynta ym shym la don ba jubab satia.
U iathuh ba da ka jingpyrshang kaba rit, ula kyrpad ia uwei u Nonghikai uba dei u Khasi ba un shim kyrpang ia ka sobjek Khasi katba u don ei ka por, kum shibynta ban iarap ia ki khynnah skul.
Halor kane, ka HNYM kala rai ban leit tynruh ia ki bor khmih ka Tnad Pule Puthi ba kan thung noh mardor ia u ne ka Nonghikai jong ka sobjek Khasi ha kane ka skul khnang ba ki para Khasi kiba sah ha ka thain kin ioh ka jingmyntoi.
Kila ong ba namar ka jingbym don ki nonghikai Khasi ha ka skul, kane kala ktah wat ia ki Khynnah skul haduh ba kim da nang bha ia ka ktien Khasi la ha ka krenka khana ne ha ka thoh ka tar.
