Shillong, K’Lyngkot 06: Ka sorkar jylla lyngba ka tnat Arts and Culture kala kren shai ba kam lah ban ithuh iaka seng All Meghalaya Dancer Association (AMDA) hynrei ka lah ban ithuh tang iaka rwai bad shad Tynrai.
Ia kane la pyntip da u President ka AMDA bah Kitbok Thabah uba la iathuh ruh ba ia kane la pynthikna da u Commissioner Secretary ka tnat Arts and Culture hadien ba u Symbud Myntri Rangbah bah Prestone Tynsong ula bthah iaki nongialam ka seng ban iakynduh iaki ophisar ka tnat haba iadei bad ka jingdawa jong ka seng.
Haba kren sha ki lad pathai khubor u bah Kitbok ula iathuh ba haka por ba u pynlong ka jingshong kyllain mongor ha khmat khyrdop Secretariat, naka liang u Symbud Myntri Rangbah ula khot iakren ban sngap iaka jingdawa ka seng AMDA.
“Haka jingiakren bad u bah Prestone, ula bthah ia nga ban leit kynduh ia u Commissioner Secretary ka tnat Arts and Culture bad hadien ka jngiakren ba sani bha, une u heh ophisar ula pyntip ba ka tnat kam lah ban ai jingithuh iaka seng AMDA” la ong u bah Thabah.
U bah Kitbok ula ong ba na ka liang u heh ophisar ka tnat Arts and Culture ula kren shai ba ka sorkar kam lah ban ai jingithuh iaka seng AMDA namar ka sorkar bad ka tnat kam don pisa hynrei ka iai kyrshan iaki nongshad bad nongrwai tynrai.
Haba iadei bad kane u president ka AMDA u bah Kitbok Thabah ula buh jingkylli iaka sorkar jylla, ba lada kam don pisa ban ai jingithuh iaka seng, te kumno ka don pisa ban siew da ki phew lak sha kiwei ki nongrwai bad nongshad kiba ju wan ban pynsngewbha iaki paidbah ka Meghalaya na ka por sha ka por.
U bah Kitbok ula bynrap ba kum u nongialam ka seng un iai bteng ban pynlong ka jingiakhih naka bynta ban ioh jingithuh iaka seng AMDA bad kumjuh ruh ban ioh jingkyrshan iala ki para nong shad bad nongrwai.
