Kyntait ka NPP ia jingkynnoh ka Congress ba “Sngap Jar” halor ka FCRA Bill

Shillong, Nailar 11 : Ka National People’s Party (NPP) kala kyntait war ia ka jingkynnoh jong ka Meghalaya Pradesh Congress Committee (MPCC) ba ka NPP kala sngar jar jar halor ka Foreign Contribution (Regulation) Amendment Bill, 2026.

Ka jingkynnoh ka dei ka bym don nongrim bad ka bym shisha bad kaba don jingthmu sain pyrthei ha lyndet.

Ka record kala pynshai shai ba ka Sorkar Jylla ba ialam ka NPP, hapoh ka jingialam u Myntri Rangbah Conrad K Sangma, kala dep ia ka Sorkar Pdeng bad bun ruh hakhmat ia ki jingsngewkhia ka Jylla halor ka FCRA Bill.

Kat kum ka kyrwoh na u nongaiktien ka NPP Aldo A Sangma (MDC), ula ong ba u Myntri Rangbah Conrad K Sangma dalade ula ialam ia ka kynhun ki nongialam niam sha New Delhi ban iakynduh ia u Myntri kam Pohiing Amit Shah bad kila pynsngew ruh ia ki jingsngewkhia ba ki don halor ka FCRA Amendment hakhmat ka Sorkar Pdeng.

“Kane kam dei ka kam ba sngap jar. Kane ka dei ka jingleit iakren markhmat ha ka kyrdan kaba halor eh jong ka Sorkar India” ong u Aldo.

“U Myntri Rangbah um shym la ai tang ki jingkren na Shillong. Ula ialam ia ki nongialam niam bad ki nongmihkhmat na ki shnong bad pynbeit ruh ban iakren markhmat bad u Myntri Kam Pohiing ka Ri. Ka kynhun kala pynsngew ia ki jingsngew khia ba iadei bad ka jingtreikam ki Balang, ki jaka pule bad kiwei ki seng kiba shaniah ia ka synniang pisa na shabar ri” ula bynrap.

Une u nongialam ka NPP ula ong ba ki jingkynnoh ka congress namar kata ka pynmih ia u dak jingkylli. Sa kaei pat ka Congress ka khmih lynti ia ka Sorkar Jylla ban leh?.

Ka NPP ka ngeit ba ia ka kam ba iadei bad ka jingsngewkhia u paidbah halor ka FCRA kam dei ban shu pynlong slogan sain pyrthei lane ka drama surok. Haba ka ishu ka lah ban ktah ia ki balang, ki skul, ki hospital bad kiwei kiwei, ka jinglong nongialam ba don jingkitkhlieh ka donkam ia ka jingiakren, jingiapynbeit bad ka jingbuddien khlem kut.

“Namar kata ka NPP ka jied ban trei ia ki ishu kiba dei hok shisha, ha ka jaka ban trei tang ban ioh headline ha ki lad pathai khubor” ula ong haba bynrap “Ka long kaba sngewsih ba ka Congress kala jied ban batai ia ka jingleit iakynduh ka Sorkar bad ki Balang ia ki nongialam ha Delhi kum ka kam ba shu sngar jar jar”.

Ula ong ba ki paidbah ka Meghalaya ki lah ban bishar ia ka jingiapher hapdeng ka synshar khadar ba don jingkitkhieh bad ka jingpynksan sain pyrthei.

“Ha ka jaka ban ialam bakla ia u paidbah da ki jingkynnoh ba sngar jar, ka Congress ka dei ban kubur ia ka jingshisha bad ai synniang lem ia kaei kaba tei, ban iakren halor ka FCRA Amendment” ong u Aldo.