Shillong Kyllalyngkot 12: U National President ka National People’s Party (NPP) u Conrad K Sangma hynne ka sngi ula kyntait ban don kano kano ka jingiasngewthuh jingmut bad ka seng BJP bad UDP ban ym pynieng kyrtong na South Shillong bad Mairang constituency.
“Kam don kano kano ka jingiasngewthuh jingmut” ong u Conrad Sangma haba iakren bad ki nongthoh khubor hynne ka sngi.
Kumba long mynta iaka Mairang Constituency la mihkhmat da u President ka UDP u Bah Metbah Lyngdoh uba long ruh u Lamphang ka ïingdorbar thawaiñ ka jylla katba iaka South Shillong la mihkhmat da u MLA ka BJP u Bah Sanbor Shullai uba long ruh u Myntri ka sorkar jylla.
U Conrad Sangma ula pynpaw ba ka dawbah hi, kadei ka jingbym lah ka seng ban ioh ia ki kyrtong kiba biang ban iakhun ia ka elekshon na kitei ki constituency bad kumta kala rai ban pynieng 58 ngut ki kyrtong na ki 60 tylli ki constituency kiba don ha ka jylla.
“Ka long kaba jia ryngkhat ba ngim shym la ioh ia ki kyrtong, watla kila don katto katne hynrei ngim shim la hun satia ia ki briew kumta ka seng kala shim ia ka rai ban ym pynieng kyrtong na Mairang bad South Shillong,” ong u National President ka NPP.
“Kam don kano kano ka jingiasngewthuh jingmut bad ka UDP ne BJP. Phi lah ban ai ia kano kano ka rai ne ka jingsngew ka jong phi, hynrei ka jingshisha hi kadei kadei kumba nga la dep ban iathuh ia phi” ong u Conrad.
