Shillong, Jylliew 21 : U President ka Meghalaya Pradesh Congress Committee (MPCC) Bah Vincent H Pala hynne ka sngi Balang ula ong ba ka Indian National Congress kam don bynta eiei ruh em ha ka jingpynkhyllem ia ka Executive Committee ba ialam da Unted Democratic Party (UDP) ha Khasi Hills Autonomous District Council (KHADC).
Kat kum ka jingong jong u, ka EC kala khyllem namar ka jingiakhru hapdeng ka National People’s Party (NPP) bad ka UDP.
“Ngim don bynta ha ka jingpynkhyllem ia ka EC ba ialam da ka UDP ha KHADC. Da kaba kren hok, ka dei ka jingiakhru hapdeng ka NPP bad ka UDP” ong u Bah Pala haba iakren bad ki nongthoh khubor hadien ka jingialang bad ki 6 ngut ki MDC ka Party.
“Haba ka NPP ka khot ia u Nongialam jong ngi Bah PN Syiem, ula iathuh ia nga bad ngi la iakren sani bha bad la iakren ruh bad ka High Command ka Party (Shuwa ban shim rai ia kane ka kam” ula bynrap.
Ka Congress kala ai ka jingkyrshan ia ka NPP ban thaw ia ka Executive Committee ba ialam da ka kynhun synrop thymmai Khasi Hills Democratic Front (KHDF) ha KHADC.
U Bah Pala ula ong ba ia kane ka rai la shim ban pynthikna ba ka party kan ioh buh hakhmat ia ki jingai jingmut ha ka jing tyrwa ban pynkylla thymmai ia ki kyndon ka Sixth Schedule jong ka Riti Synshar ka Ri.
‘Da kaba iohrung hapoh ka Council, ngin lah ban shim rai ba ha kano ka rukom yn pynkylla iaka Sixth Schedule bad kumno ba ngin lah iada ia ki briew jong ngi. Ngim ioh eiei n aka jingiasoh hynrei ngi ioh pat ban buh hakhmat ia ki jingai jingmut ha ka jingpynkylla ia ka Sixth Schedule” ula bynrap.
Ula kynnoh ruh ba ka BP kala pyrshang ban pyntroin ia ka Sixth Schedule bad ong “Namar ka jaka tynrai jong ki paid Khasi Jaintia bad Garo khamtam ha ki jaka lum, baroh ki 11 tylli ki District Council kin hap hapoh ka Sixth Schedule, namar kata ka BJP kala pyrshang ban pyntroin ia ka Sixth Schedule. Kila wanrah ia ka Bill ha u 2019 ha Rajya Sabha bad ka Committee of Home Affairs kala dep phah ia ki jingai jingmut ha ka 5 tarik Lber 2020 sha ka Sorkar bad mynta ka Sorkar ka don jingthmu ban wanrah noh iaka Bill”.
U Bah Pala ula ong ba ka Sorkar Pdeng ka donkam ia ki Resolution na ki Council bad ki Jylla shuwa ban wanrah ia ka jing pynkylla haba bynrap “namar kata, hapoh 5-6 bnai, ngin lah ban shim ia ka rai khamtam ia ka elekshon u Rangbah Shnong, ia ka hok u paidbah ha ka riti bat khyndew-ka long kaba kongsan ia ngi ban iada bad kyntiew iala ki jong ki briew”.
Haba kylli, une u Khliehduh ka MPP ula ong ba ka UDP ka khlem wan iakren satia ia ka Party ban pan jingkyrshan. “Ngi la ju iatreilang bad ka UDP ha ki snem bala leit noh hynrei ki khlem khot ia ngi ban iatreilang. Ngim don jingeh ban iatreilang bad ka UDP hynrei ngi don jingthut ban iatrei bad ka BJP” ula bynrap.
