Shillong, Rymphang 19: U National Secretary ka Bharatiya Janata Party (BJP) u Rituraj Sinha hynne ka sngi ula pyntip ba ka tnat ialehkai (Ministry of Sports) ka sorkar Meghalaya kala kyntait iaka jingpan jingbit ban pynlong iaka jingialang u Myntri Rangbah duh ka ri India u Narendra Modi hapoh ka P.A Sangma Stadium.
Haba kren sha ki lad pathai khubor u Rituraj ula iathuh ba ka BJP kala pan jingbit ban pynlong iaka jingialang u Modi ha P.A Sangma Sports Complex kaba don Tura West Garo Hills hynrei ka party ka dap daka jinglyngoh baka tnat ialehkai ka sorkar jylla ka pyntip ba ym long ban pynlong jingialang hapoh kane ka Stadium namar ym pat dep ban pyntrei ia kane ka Stadium.
“Kumno ka tnat ialehkai ka sorkar Meghalaya ka pyntip ba ym lah ban pynlong iaka jingialang u Myntri Rangbahduh ka ri u Narendra Modi hapoh ka P.A Stadium ryngkat bad ka jingkdew ba ym pat dep ban trei pyndep ia kane ka Stadium haba arbnai mynshwa u Myntri Rangbah ka jylla Conrad K Sangma ula plie paidbah ia kane ka jaka ialehkai” la ong u Rituraj.
U Rituraj ula ong ba kane ka jingkam ka tnat ialehkai ka sorkar Meghalaya ka long kamkai namar wat haka por plie ia kane ka Stadium da u Conrad, la pynlong ruh daka jingialang kaba heh, ha ryngkat bad ka iaput ia tem, ki jingshad bad kiwei kiwei de.
Ula ong ba, “Lada ka tnat ialehkai ka sorkar Meghalaya mynta ka kynti ka pyntip ba ym pat dep pyntrei ia kane ka PA Stadium ha Tura, te balei u Conrad u leit plie paidbah ia kane ka Stadium haka 16 tarik Nohprah 2022”.
U Rituraj ula ong ba kane ka jingkhanglad ka tnat ialehkai ka sorkar Meghalaya ia u Modi ban pynlong jingialang hapoh kane ka Stadium ka paw shai ba ka sorkar synroplang ka Meghalaya Democratic Alliance (MDA) haka jingialam ka National People’s Party (NPP) ka shep tieng iaka jingwan ialap ilekshon u Modi ha Tura kaba dei ruh ka konstitwensi u myntri rangbah ka jylla u Conrad K Sangma.
Ula ong ba ki paidbah ka thain Garo Hills bad ka jylla Meghalaya baroh kawei ki don ka hok ban iohi bad ban ioh sngew ia kaei kaba u Modi u don ban kren sha ki paidbah namar mynta ka kynti ki paidbah kila phai khmat shaka BJP haka jingialam u Modi.
“Lada ki paidbah ka Meghalaya bad ka ri India baroh kawei ki angnud ban iohi ne ioh sngew ia kaei kaba u Modi u don ban kren, ym don bor hapoh kane ka pyrthei ban khanglad bad u Modi un wan ialap ilekshon beit, la kadei ha Garo Hills ne ha Shillong ne ha kano kano ka thain jong ka jylla” la ong u Rituraj.
Shuh shuh ula bynrap ba ia kane ka PA Stadium la tei haka jinglut kumba T.127 klut 90% ka pisa la bei daka sorkar pdeng hynrei mynta naka liang ka sorkar jylla ka ialeh ban khanglad ia u khlieh duh ka ri ban pynlong jingialang ha kane ka Stadium.
