Kyntait ka KSU ban pdiang ia ki jingkular ka Sorkar | Kyntu ia ki 60 MLA ban kyntait ia ka MSIPF

CM : Ki Amendment kin ym pyntroin ia ki kyndon ka LTA ne iaid lait iaki ADC

Shillong, Lber 11 : Ka Khasi Students’ Union (KSU) ha ka sngi Ba-ar kala kyntait ban pdiang ia ki jingkular da ka ktien jong ka Sorkar bad kyntu ia baroh ki 60 ngut ki MLA ba kin kyntait ia ka Meghalaya State Investment Promotion and Facilitation Act, 2024, kaba thmu ban thied jaka ban aiwai sha ki nongsengkam shimet, kumba ka long mynta ha kane ka Dorbar mang tyngka ba dang iaid jong ka Iingdorbar Thaw Ain.

Kane kala mih hadien ba ki nongialam ka KSU kila leit iashimbynta ha ka jingialang bala khot pynlong da u Myntri Rangbah ka Jylla Conrad K Sangma ha ka jingiadonlang u Symbud Myntri Rangbah Bah Prestone Tynsong bad u Chief Secretary ka Jylla Bah DP Wahlang, hadien ba kane ka Seng kala leit tur ban iakhih sha Iingdorbar Thaw Ain.

Ka Sorkar kala kular ban wanrah ia ki jingpynkylla (amendment) kiba donkam ha ka MSIPF Act, 2024 bad ia ka draft rule ha ka sien shong dorbar ban wan ka Iingdorbar Thaw Ain hadien ba dep iasyllok bad baroh ki kynhun bapher bapher.

“Ngim pat sngew hun ia kaei kaba mih na ka jingialang (kaba neh) tang kumba shikynta shiteng. Ngi la kren sha ka Sorkar ba ki jingkular tang da ka ktien ka dei kaba ngim lah ban pdiang namar ngi dang don ka jingsngew artatien bad lada ka Ain (la shah) ba kan long kumne kumba ka long, dei ban pynduh pyndam syndon ia ka” ong u samla Donald V Thabah, General Secretary ka ka KSU haba iakren bad ki lad pathai khubor hadien ka jingialang.

Ula pyntip ba ka Central Executive Committee (CEC) jong ka KSU kan sa shong jingialang shen ban rai ia kaei ka sienjam ban sa shim halor kane ka kam.

Haba kyntu ia baroh ki 60 ngut ki MLA ba kin kyntait ia ka MSIPF Act, 2024, u samla Donald ula ong “ Ha kane ka khyllipmat ngi dei ban kyntait noh ia ka Principal Act jong ka MSIPFA, 2024. Ka long kaba kongsan ia ki MLA riewlum ba kin kren na ka bynta ki paidbah haba wanrah ia kane ka Bill hapoh ka Iingdorbar”.

“Ngi dei dep ban phah ia ki dorkhas sha baroh ki 60 ngut ki MLA bad mynta ka shong satang ha ki” ula bynrap.

U samla Donald ula ong ruh ba ki jingtyrwa bala tyrwa ban wanrah ha ka MSIPFA kim pat biang satia ban iada ia ka hok jong ki riewlum trai muluk jong ka Jylla.

“Kumta, ngi la ban jur ia ka Sorkar ba kane ka Act ka dei ban pynduh pyndam shuwa lada ka pynmyntoi tang ia ki nong kynshew kam ym ia ki paidbah” ula ong.

Kat kum ka kyrwoh na ka Ophis u Myntri Rangbah ka Jylla, la iathuh ba ia ka MSIPFA, 2024 ka dei kaba la pynlong ain ha u Lber 2024 da ka jingthmu ban kyntiew bad pynsuk ia ka jingkynshew kam ha Meghalaya.

Kala ong ba halor ki jingsngewkhia bala pynsngew da ki nongshongshnong, ka Sorkar kala tyrwa ia ki jingpynkylla ha ka ain, ki ban pynthikna ba ka Ain kan ym pyntlot ia ki kyndon ka Meghalaya Transfer of Land (Regulation) Act, 1971 lane iaid lait ia ki District Council.

Ki Amendment bala tyrwa ban pynkylla ki long kumne:

• Ka amendment bala tyrwa kan pynthikna ba ka Act kan ym pyntlot ia kino kino ki kyndon jong ka The Meghalaya Land Transfer of Land (Regulation) Act, 1971.
• Ka amendment bala tyrwa kan pynthikna ba ka Act kan ym iaid lait ia kino kino ki kyndon jong ki Autonomous District Council.
• Kin iada ia ka lad iohkam iohkam ki trai Jylla-90 percent na ki kam yn bhah kyrpang ha ki kyrdan non-managerial bad 50 percent ha ka kyrdan managerial.

U Myntri Rangbah ula pyntip ba kine ki amendment bala tyrwa kila weng ia ki jingsngewkhia jong ki nongshong shnong bad pynthikna b aka Act kan ai jingmyntoi ia ka Jylla, haba iada ia ka jingmyntoi jong ki paidbah.

Ula ong ruh ba ka Sorkar kan iai bteng ban iakren bad ki kynhun bapher bapher, ki Dorbar Shnong bad kiwei kiwei ban pynthikna ba kane ka Act kan long na ka bynta ka jingmyntoi jong u paidbah bad pynthikna ia ka jingiada ba pura ia ka hok jong ki trai ri trai muluk.