Kyntait ka KHNAM ban iatreilang bad kiwei ki party namar ka Jaidbynriew

Shillong, K’lyngkot 04 : Ka Khun Hynniewtrep National Awakening Movement (KHNAM) ha ka sngi Saitjain kala pynpaw ba kam long satia kaba kloi ban iatreilang bad kiwei ki seng sain pyrthei namar ba ieng halor ka nongrim ban iasaid na ka bynta ka Jaidbynriew.

Hadien ka jingialang jong ka Central Executive Committee (EC), u Working President Thomas Passah ula ong ba ka daw ba ka party ka rai ban nym iatreilang bad kiwei ki party ha ka elekshon Autonomous District Council (ADC) ka dei namar ki nongrim bad ki mat treikam ki dei kiba iapher.

“Ki mat treikam jong ngi ki dei na ka bynta ka Jaidbynriew. Ngin sa pynkhreh ia ka manifesto kiba pynpaw ia ki mat bapher bapher” ula ong.

U Working President ula pyntip ruh ha ka jingialang hynne ka sngi, baroh ki 10 ngut ki kyrtong bala pynmih ha ka thup ba nyngkong, la kynti ba kin don ka jingiasngewthuh jingmut halor ki mat treikam jong ka party bad ba kumno kin leit sha ka elekshon MDC.

“Ngi hap ban sngap ia ki jingeh jong ki ruh khnang ba ngin pynthikna ba ngin don kawei ka thong, kawei ka mat ha kane ka elekshon MDC khnang ba ngin pynthikna ba ngin mih kum ka kynhun ym kum ki kyrtong shimet shimet” ula ong.

Namar ka jingbym don ka ain kyntiap seng ha ki ADC, u Bah Passah ula ong “Namar kata, ngi la pyrshang ban iakren bad ki kyrtong ba kin pyni ia ka jingiatylli hapdeng ki kyrtong khamtam hadien ba ki jop, ym dei ban don ki kyrtong ki ban mih na ka party hynrei ban gin iatylli ha kawei ka thong”.

Ka KHNAM haduh mynta kala dep rai ia 10 ngut ki kyrtong ha ka elekshon KHADC ka ban long la 21 tarik Rymphang. Kane ka party ka lah ban pynmih ia ka thup kyrteng kaba ar hapoh ka 6-7 sngi ban wan.

“Ngi don sa 10 ngut kiba aplai ticket bad ka State Election Committee ka dang khmih ba kumno yn leh ia ki. Ka shong ha ka jingai jingmut jong ka SEC bad ka CEC kan sa shim rai hapoh ka 7 sngi” ong u Bah Passah haba bynrap ba ka KHNAM kam don jingmut satia ban sei kyrtong na baroh 29 constituency.