Shillong, Lber 5: U President ka Jaintia National Council (JNC) u Bah Sambormi Lyngdoh ula kyntait ia ka jingkynthoh jong u Nongialam ka Liang Pyrshah bad Nongialam ka TMC Dr. Mukul Sangma ba ki samla pule ki rung sha ki sengbhalang ban ioh lum pisa be-aiñ.
“Ki samla pule kim rung dkhot sha ki sengbhalang ban ioh jingmyntoi ha ka pisa ka tyngka” ong u Bah Lyngdoh ha ka jingialang kaba la lum da ka Nangrimgimin Achik Dol (NAD) kaba dei ka kynhun jong ki sengbhalang ka rilum Garo ha ka jingialang kaba la long ha Ampati, South West Garo Hills hynne ka sngi Palei.
“Kila ia wan lang ban iada ia ka jaidbynriew, ban iada ia ka hok bad ban rah ia ki mat kiba ktah ia ka lawei”.
Ula ong shuh shuh, ba ka jingjur jong ka jingiashimbynta ki samla ha ki kynhun sengbhalang ka pyni ia ka jingbym don jingshaniah ia ki nongialam sain pyrthei.
Katkum ka jingong u Bah Lyngdoh, bun ki samla bad ki dkhot ka imlang sahlang ki shaniah ha ki sengbhalang na mar ba kila shimkhia ia ki mat ban iada ia ka hok jong ki jaidbynriew riewlum, ban iada ia ka khyndew ka shyiap bad ban pynsngew ia ki mat kiba ktah ia ka imlang sahlang bad kiba ktah ia ka thaiñ.
Kane ka jingialang kadei halor ki artylli ki mat kiba sngewkhia kiba ktah ia ka rilum Garo, ha kaba ki nongiashimbynta kila dawa ba dei ban leh mardor bad ban ai ka jingbishar kaba hok halor ka jingshah pyniap u Delsing Marak uba long u dkhot jongka sengbhalang kaba dei kaba don lang hapoh jong ka kynhun NAD.
Ki nongialam sengbhalang kila kyntu ia ki bor kiba dei khmih ban pynthikna ba kito kiba donkti ha katei ka kam runar kidei ban shah pynshitom khlem da pynslem shuh.
Kila dawa ruh ba dei ban leh da kaba tyngeh bad ban leh kham kloi da ka sorkar ha kaban ithuh ia ki nong Bangladesh kiba la wan rung be-aiñ kiba shong basah hapoh ka rilum Garo.
Katkum ka jingpynpaw jong ki sengbhalang, kila ong ba kine ki mat kidei kiba sngewkhia bha ha kaba iadei bad ka jinglong jingman jong ki jaka, ka jingshngain bad ka jingiada ia ki jaidbynriew riewlum bad ia ka hok jong ka khyndew ka shyiap.
Ki nongialam kiba la don ha kane ka jingialang kila banjur ia ka jingdonkam ban don ia ka jingshim ia ka jingkitkhlieh na ki nongialam kiba la shah jied ha ki paitbah bad ki iengskhem ba ka kamram jong ki sengbhalang ka long ban iada ia ka bha ka miat bad ia ka hok jong ki jaidbynriew riewlum ka jylla Meghalaya.
Ha kane ka jingialang paitbah la sakhi ia ka jingwan iashimbynta ki nongialam bad ki dkhot jong ki sengbhalang bad ki nongialam na ka imlang sahlang na kylleng ki bynta jong ka rilum Garo, kaba pyni ia ka jingsngewkhia halor ka synshar khaddar, ka jingshngain bad ia ka hok jong ki jaidbynriew.
 u Bah Sambormi Lyngdoh ula kyntait ia ka jingkynthoh jong u Nongialam ka Liang Pyrshah bad Nongialam ka TMC Dr. Mukul Sangma ba ki samla pule ki rung sha ki sengbhalang ban ioh lum pisa be-aiñ.){kind=link}