Kyntait ka HNLC ba shah kem ki dkhot na ka jingpynbthei bomb | Hukum ia u DyCM ban siew ia ka khajna

Shillong, Nohprah 21 : Ka Kynhun kiengatiar bala khein be-ain-ka Hynniewtrep National Liberation Council (HNLC) kala kyntait ia ka jingkam ki Pulit ba kila kem ia ki dkhot ka seng ba donkti ha ka jing pynbthei bomb IED hapoh ka Dhar Construction Company haba hukum ruh ia u trai bad Symbud Myntri Rangbah ka Jylla Bah Sniawbhalang Dhar ba u dei ban hap siew sha ka pla tyngka ka seng kum ka Khajna.

“ Ka jingkam jong ki pulit ba ki la ioh kem ia ki dkhot kiba donkti ha katei ka jingjia ha Dhar Company ka dei tang ka jingthok kaba shai. Kito ki briew kiba ki kem kim dei ki dkhot ka HNLC, bad baroh kito ki tiar kiba ki la kurup ki dei ki tiar jong ki pulit hi” ong u General Secretary ka HNLC Bah Sainkupar Nongtraw ha ka kyrwoh ba pyllait ha ka sngi Nyngkong.

Kat kum ka jingong jong u, “Ki dkhot ka HNLC kiba donkti ha ka jingpynbthei ia u IED ha ka 15 tarik ki lah wan phai suk sha ka ktem lajong” haba buh jingkylli “Lada ki pulit ki la tikna ba dei kito ki briew kiba donkti, balei pat ki dang rah sa ia ka lok u Emanuel Suchen@Shwa, u dkhot ba satar bad ba shitrhem ka HNLC?”.

U Bah Sainkupar ula ong “ Ha ka histori jong ka HNLC ym pat ju don ruh kawei ka sien ba ngi la rah ne pynthut ia ki bahaiing bahasem jong ki Minister ne ki Pulit. Pynban, ka tnat pulit ka ju kem bad pynthut ia ki bahaiing bahasem jong ki dkhot ka seng. Ki la kem teng ruh ia i kurim bad i kiaw jong u Rangbah shipai jong ka seng katta ki dei kiba wan na ka iing kaba don burom bha” haba bynrap “Ka rukom treikam jong ka HNLC mynta kam dei shuh kaba iaid da ki buit treikam ki barim. Kumta ngi maham lypa ba lada ka tnad pulit kam sangeh ban kem bad pynthut ia ki bahaiing bahasem jong ki dkhot ka seng, ngin sa leh tyngeh ia kaba ngi dei ban leh.

Halor ka jingkam ki Pulit ba uwei na kiba pynbthei bomb u dei uba donkti ha ka case POCSO ne leh beijot khynnah, ka HNLC kala ong “ Ka tnad pulit ka kam ba uta u briew uba donkti ban pynbthei bom u dei uba don jingiadei bad ka POCSO bad ki pulit ki shu iathuh khana kai iaki media ba ki shu register tang iaka case ia uta u Tongper. Lada kane ka jingkynnoh ka long kaba shisha balei kim kem, kim tohkit bad rah sha iingbishar?

“Kaba thamula ka long ba ia kane ka jingkam ki pulit lah nang shut pynjlih shuh shuh da ki katto katne ki lad pathai khubor. Ka aiń POCSO ka dei ka aiń kaba khor bha, Kiba don iaka case POCSO, ka aiñ ka treikam stet haduh katta katta, ka jingpynsawa ki media kan nym lah ban bujli iaka jingtreikam hok ka aiń. Ka jingkynnoh khlem ki sakhi ne khlem da rai pynrem daka iingbishar hi kan shu kut tang ha ki jingkynnoh. Kane ka jingkynnoh ka tnad pulit ka dei tang shi bynta ban pynthohbria iaka HNLC” kala ong.

Halor ki jingjulor na ka jingpynbthei bomb, ka HNLC kala ong ba ka jingpyni jong ki pulit ia ka kali kit um kaba la julor ka dei tang i ‘phngit i barit’ ban tap eit-miaw iaka jingshisha kaba lah jia ha katei ka jaka.

“Ha katei ka step jong ka 15 tarik lah don kumba 20 tylli ki kali, hynrei 6 tylli na kitei ki kali ki la julor bha, bad 2 tylli na kita ki dei ki kali kit umphniang. Ia u bom IED la buh ha khrum kawei napdeng ki ar tylli ki kali kit umphniang, ym ha khrum ka kali kit um kumba ki kam. Ka kali kit um ka don kham ha pajih khyndiat na katei ka jaka ba la buh ia u IED. Ki kali kit umphniang ki la julor bha” kala kam.

Ka HNLC kala iathuh “Ka metbah jong kawei ka kali kit umphniang ka lah pra laka jong bad kawei ka kali kit umphniang pat ka lah hap sha riat. Tang mar ia ioh jingtip, ki pulit ki la leit mar mar sha katei ka jaka ban pynkhuid, ban tan,ban sei bad ban pynkynriah ia baroh ki kali, hynrei kaba i shutia ka long ba ka tnad pulit ka la pyni paidbah tang ia itei i kali kit um. Ka jingpait jong ki iit kali ka long kaba shyrkhei bha bad ki la sied lut sha madan sha madiah wat ki lah sied shaduh shnong”.

Ka HNLC kala buh jingkylli “ Lada kam dei ka jingjia kaba la heh bha, balei pat ki pulit ki la buhrieh ia kane ka jingjia haduh 3 sngi tad hadien ba ka HNLC ka hap pynbna paidbah ia kane ka khubor? Kaba sngewtynnat ka long ba u SP dalade u dep ban kubur ba ka jingbthei ka long kaba khlainbor bha. Shuh shuh, ngi kwah ban pynkynmaw iaka jingkren jong ki heh pulit, u CM, Ki Deputy CM ba ki ju kob naka por sha ka por ban nym ailad iaka HNLC ban khie khlieh hynrei ka long markhongpong haba ka HNLC ka nang lah khambha ban pyni iaka jingtbit ki kti bad ka khlieh ban treikam”.

Haba pynshai ia ki daw ka jingpynbthei bomb, u Bah Sainkupar ula ong “Ka jingkam jong u Conrad bad u Sniawbhalang ba ka HNLC ka ong shiphang u Sniawbhalang u siew, shiphang ym siew, ka dei tang ka jingkwah kyllain jong ki hi. Mynshwa u Sniawbhalang u la bei tyngka ia ka HNLC, hynrei hadien pat u la shetkylla ia ngi da kaba ym treh shuh ban bei tyngka. Na kata ka daw, ngi la hiar thma ia ki jingdon jingem jong u. Kane ka jia kumjuh kumba la jia ha ka histori, u Rajiv Gandhi ruh nyngkong u kyrshan bha ia ka LTTE, hynrei hadien u kynran dien noh, te u duh syndon ia la ka jong ka jingim”.

“Ka HNLC ka maham lypa ia baroh ki nongtrei nongbylla jong u Sniawbhalang ba kin sangeh ban trei bad u, khamtam eh ia ki bar jylla. Lada ngin pynbthei sa shisien, ngin leh da kaba khamheh shuh shuh, ym tang 30 kg kumba ngi pynbthei ha katei ka miet, hynrei ngin buh ban pynbthei haduh 60 kg ha kano kano ka jaka ba longtrai da u Sniawbhalang bad ngin nym kitkhlieh lada ka jia kano kano kaba sngewsih” ula ong.

“Ko Sniawbhalang da kynmaw bha ba me hap ban siew sha ka pla tyngka ka seng kum ka khajna. Kiwei ki politician ne ki hehspah nongkhaii ki dei ban sngewthuh shai wat ia ka Dhar Company kaba dei jong u Deputy CM ngi dang iohlad ban leh kumne, sa katno tam kan long kaba suk iangi ban ngin thombor ia kiwei ki bym dei ki Minister bad kiba dei tang ki hehspah” ula pynkut.