Kyntait ka BJP ia ka jingialam bakla ka INC | Ka VB-G Ram G Act kan pynkylla ia ki jaka nongkyndong ka Meghalaya

Shillong, K’lyngkot 05 : Ka Bharatiya Janata Party (BJP) Meghalaya kala pynksan ia ka ain thymmai Viskit Bharat-Gurantee for Rozgar and Ajeevika Mission (Gramin) (VB-G Ram G) Act, 2025, haba niew ia ka kum u mawmer ban sah khana, ka ban sa wanrah ia ka jingkylla kaba khraw ha ka kam kamai jakpoh ki paidbah ha ki jaka nongkyndong ka Meghalaya.

Haba kren sha ki lad pathai khubor, u General Secretary ka BJP Meghalaya Bah Wankitbok Pohshna ula ong ba kane ka Ain ka nang pynbun shuh shuh ia ka sngi iohkam ki nongbylla unskilled na ka 100 sngi sha ka 125 sngi jong man kawei ka longiing ha nongkyndong ha ka shisnem, ka ban pynsting ia ka jingnang bun ki jingdonkam jong ki longiing ha ki jaka nongkyndong.

Ula bynrap “Ka jingshisha ka long ba kane ka Ain ka ai shuh shuh ka lad ia ki longiing ha nongkyndong jong ngi da kaba nang pynbun ia ka sngi ba kin iohkam….ym shym la knieh noh ia ka hok jongno jongno ruh, ha ka jingshisha, lah nang pynkhlain shuh shuh ia ki”.

Ula kyntait ia ki jingkam ka Liang Pyrshah (Congress) ba kane ka Ain kan pynduh noh ia ka jingiohkam ki briew ha ki jaka nongkyndong lane pyntlot ia ka jingtrei ki Gram Seva da kaba ong “Kaei kaba kylla ka dei ka thong-ha ka jaka ka jingiarap ba shipor, ngi lah shna ia ki jingtei kiba neh slem kum ki surok, ki nur um sha ki jaka rep, ki iingskul, wat ki jingtei ha ki shnong ki thaw ki ban kyntiew ia ki shnong ki thaw ba neh pateng la pateng”.

Ula bynrap baka Act ka pynthikna ia ka jingsiew bai nong ha ka por kaba dei, ban siew bainong da ki kor digital ban nym don ka jingleh thok, tynrong ia ka jingbahkhlieh, wanrah ia ka jingtreikam kaba shai bad ba khuid.

Ka BJP kala pynrem jur ia ka Congress halor ka jingpynsaphriang ia ka khubor lamler bad ki bym don nongrim haba pynpaw ba kane ka Ain ka ai jingiada ia ki Dorbar Shnong haba sam lang ia ka synshar khadar.