Shillong, Jymmang 01 : Ka Bharatiya Janata Party (BJP)-Meghalaya hynne ka sngi Nyngkong kala pynshai ba ym pat don satia napdeng ki MLA ka AITC kiba la wan iakren bad ka party ban pynpaw ia ka jingkwah ban iasohnoh bad ka BJP.
“Ngim lah ban ai jingkren eiei tad hduh ba ki (MLA ka AITC) la wan iakren bad ngi” ong u Bah Ernest Mawrie, President ka BJP haba iakren bad ki nongthoh khubor.
U Bah Ernest ula ong ruh ba ka party kam don jingtip satia halor ka sienjam bala shim da u MLA ka party na Pynthorumkhrah bad Myntri Sorkar Bah AL Hek ban iakren bad ki nongialam ka AITC ba kin wan iasoh bad ka BJP.
“Ngim pat ioh khubor eiei haduh mynta la ki MLA ka TMC kin wan iasoh bad ngi” ula ong haba bynrap ba ka party kala ioh tang ia u Bah Hek ba ula ai jingkren ha ki lad pathai khubor ba ula iakren bad ki nongialam ka AITC haba iashong dih sha.
Haba pynpaw ba baroh ki long kiba pdiang ban wan iasoh sha ka BJP, u bah Ernest ula ong “Hynrei ka dei ban don ka jing ai ktien na ka Jylla sha ki Nongialam ha Delhi bad kane ka dei ka lynti ba hap iaid”.
