Shillong, Rymphang 24 : U Myntri bording ka Jylla Bah Metbah Lyngdoh ha ka sngi Ba-ar, ula iathuh ia ka jingpyrshang ka MePDCL ban pynkhlain ia ka jingmaramot ia ki transformer, da ka jingkynshew pisa ba T.2 klur, ka ban pynkiew arshah ia ka jinglah jong ka Jylla ban pynbiang transformer na ka 480 sha ka 860 ha ka shisnem.
“Ka jingdon ka jingbujli ia ki transformer na kiba sniew ha kine ki san snem bala leit noh kala pyni ia ka jingkiew bha, kaba long 87% ha u 2021-22, 106% ha u 2022-23, 96% ha u 2023-24, 99% ha u 2024-225 bad 96% haduh mynta ha u 2025-26” ong u Bah Metbah.
Ka MePDCL ka pynthikna ia ka jingkhmih ia ka jingbha ki transformer ha man ki kyrdan, kynthup ka jingleit khmih ha ki karkhana ba shna, ka jingpynrung kyrteng ia ki nongdie, bad ka jingleh ia ki test ha centra store.
U Myntri ula pynsngew ruh ia ka plan ban buh ia ka NABL Laboratory ban test ia ki tiar, kynthup ki transformer, ka ban long kaba nyngkong eh ha ka thain Shatei Lam Mihngi.
