Shillong, Naiwieng 14: Ka Ministry of Education ka Sorkar Pdeng, ha ka sngi Palei, kala thung ia ka Inquiry Committee ban tohkit halor ki jingkynnoh bapher bapher pyrshah ia ka jingpyniaid bakla ia ki kam ki jam ha NEHU da u Vice Chancellor kynthup ka jingkynnoh thungkam be-ain.
Ka hukum jong ka Ministry bala soi da u DK Himanshu, Under Secretary ka Sorkar India, kala wan 10 sngi hadien ka jingshah thngan ba khlem pud jong ki samla pule North Eastern Hill University Students Union (NEHUSU) bala kyrshan da ka KSU-NEHU Unit, bad ka jingkhang dam ia ka skulbah ban pyrshah ia ka jingbym nang bad jingbym ler treikam jong u Vice Chancellor, u Registrar bad Deputy Registrar, kaba la ktah jur ia ka jingtreikam jong ka University.
Ki samla pule kila dawa ia u Vice Chancellor ban hiar shuki mardor bad ban wengkam noh ia u Registrar bad Deputy Registrar.
Haba shimkhia ia ki jingpynsngew jong ki samla pule, ki seng jong ki samla pule bad ki khubor ba mih ha ki lad pathai khubor, ka Ministry of Education kala thung ia ka Committee ba arngut ki dkhot, ki ban pynlong ia ka jingtohkit kaba bniah halor ki jingkynnoh baroh.
Ka Committee kan tohkit ia ka jingkynnoh thungkam be-ain kynthup ia ka jingthungkam ia u Registrar bad u Deputy Registrar, ia kiba la kam ba ki dei ki daw bah halor ka jinghiar kyrdan jong ka skulbah kaba la paw ha ka National Institutional Ranking Framework (NIRF).
Ka Committee kan tohkit ruh ia ki jingkynnoh halor ka jingbym lah pynbiang ia ki jingdonkam ba kongsan ha ka skulbah kynthup ia ki jingtei, kaba la ktah ia ka pule dangle bad ka bha ka miat ki samla, ka jingsngap mynthi jong u Vice Chancellor ia kiba bun ki jingujor bad ki dorkhas na ki seng ki samla pule kynthup ka jigndawa ban wanrah ia ki jingkylla kiba donkam.
Ka Ministry kala thung ia u Prof DP Singh, Chairman barim ka University Grant Commission (UGC) kum u Chairman ka Inquiry Committee bad u Prof Dilip Chandra Nath, Vice-Chancellor barim ka Assam University kum u dkhot ba-ar jong ka Committee.
Ia kane ka committee la bynshet ban tohkit ia kawei pa kawei ka jingujor bad ban aiti ia ka kaiphod hapoh ka 15 sngi, kynthup ki jingai jingmut ban lah pynbeit ia ki kynrum kynram baroh.
Ka Ministry kala bthah ia ki bor pyniaid ka NEHU ba kan ai ia ka jingiatreilang kaba pura bad kane ka Committee, kynthup ka jingpyn biang ia baroh ki kot ki sla bad ki jingkyrshan kaba donkam da ka Committee.
