Guwahati, Nohprah 22 : Ka seng Hindu-Kutumba Surakshya Parishad (KSP) na Assam, kala byrngem ban pynlong ia ka jingiakhih ha Byrnihat la 24 tarik Nohprah namar ka jingbym urlong ka jingdawa ban plie ia ka Krem Mawjymbuin ban lehniam ki paid Hindu.
Ka KSP kaba la buh ia ka 23 tarik Nohprah kum ka por ba khatduh ia ka Sorkar Jylla ba kan pynbeit ia ka jingialang bad baroh ki kynhun nalor ban pynbeit ia ka jingleit jurip jong ka kynhun sha Krem Mawjymbuin.
Kane ka Seng kala byrngem ban pynlong ia ka jingpakhang surok ha ka 24 tarik Nohprah ha ka thain Byrnihat.
Ka krem Mawjymbuin kaba la pawnam ia ka jingdon u mawjymbuin ba iasyriem kum u mawlehniam Shiva, ka dei kaba la khang ia ki paid Hindu ban wan lehniam naduh u Nailar 2024 hadien ka rai jong ka Dorbar Shnong Mawsynram.
Artylli ki seng Hindu ba kynthup ia ka Sanatani Gagrata Prahari bad ka Hindu Surakshya Sena, kila pynthikna ia ka jingiashim bynta lang ha kane ka jingiakhih jong ka KSP.
U President ka KSP Satya Ranjay Borah ha ka kyrwoh ula pynthikna ia ka jingwan iashimbynta lang kine ki artylli ki seng.
U Borah ula ban jur ba kane ka jingiakhih ka dei ka hok ban pynlong kat kum ka riti synshar ka ri bad ka dap ban pyni ia ka jingaiti lut ha kaban pynneh ia ka dustur hiar pateng, kumba la kdew ha ka Article 51(A) jong ka Riti Synshar ka Ri India.
“Kane ka dei ka jingkyrpad ba khatduh jong ngi ia ki bor khmih ba kin pynbeit ia ka jingialang na ka bynta jong ngi bad ki kynhun bapher bapher bad ban pynbeit ruh ia ka jingialeit jurip sha krem Mawjymbuin hapoh ka por bala buh. Ngi la leh iala ka kamram jongngi kat kumba la pynkup bor ha ka Article 51(A) jong ka Riti Synshar ka Ri India.
Ula ong ba ha ri synshar paidbah kum ka India, ngi don ia ka hok ban pyni ia ka jingpyrshah jong ngi ha kano kano ka bynta jong ka Ri kaba dei halor kano kano ka kam.
“Ngi kwah ban phah ia ka jingkyrpad jong ngi sha u Ophis u Myntri Rangbah ka Meghalaya ba kin khmih ia kane ka kam bad ban leh ia kaba donkam ban leh kham kloi kat kaba lah. Lem kumta, ngin pynlong ia ka jingiakhih jong ngi ha Byrnihat ha ka 24 tarik Nohprah” ula ong.
 na Assam, kala byrngem ban pynlong ia ka jingiakhih ha Byrnihat la 24 tarik Nohprah namar ka jingbym urlong ka jingdawa ban plie ia ka Krem Mawjymbuin ban lehniam ki paid Hindu.){kind=link}