Guwahati, Nailur 17: Ka jingiakynad kaba dang iaid shakhmat halor ka jingpyrkhing ia ki kali tourist Assam hapoh ka jylla Meghalaya, mynta kala kylla khongpong ha kaba ka Motor Parivan Sewakarmi Sanmilita Manch, Assam (MPSSM) kala pynbna da ka non-cooperation movement naduh ka por 5 baje mynstep ha ka 18 tarik u bnai Nailur.
Kane ka rai kala wan ban jubab kylla ia kaei ba ka kynhun kala niew kum ka “jingbym lah pdiang bad ka khwan myntoi shimet” ia ka jingdawa jong ka All Khasi Meghalaya Tourist Taxi Association (AKMTTA) ban khang ia ki kali tourist kiba dei nabar ka jylla Meghalaya.
Kane ka kynhun ki nongniah kali na Assam ka kynthup ia kali tourist Dzire, Tata Sumo, Innova, Travellers, bus operators, bad ki tanker drivers ha kylleng jong ka jylla.Kane ka kynhun kala iakhun pyrshah da kaba ong ba ka kali jong ki ka don ia ka permit jong ki lai tylli ki jylla ba kynthup ia ka Assam, Meghalaya, bad Arunachal Pradesh, bad don ruh kiba don ia ka all-India permits.
“Wat hapdeng kane, ki kali jong ngi ki shah khang, shah pynsangeh,shah pyndik ha ki jaka jngohkai pyrthei ha Meghalaya, lada kane ka dang ïai bteng, ngin nym phah ïa kino kino ki kali shapoh Meghalaya,” ong ka MPSSM.
Katkum ka MPSSM, ki jingkhang ki lah ban wanrah ïa ka jingktah ha kylleng ka kam jngohkai pyrthei jong ka thaiñ, khamtam eh ba ka Meghalaya tour operators ka shanniah ha ki tourist kiba wan poi ha Guwahati’s airport bad ha railway station.
“Kum kine ki jingpynthut ki lah ban ktah jur ïa ki hotel, ki restaurant, ki nongdie jingdie ha surok, ki petrol pump, ki khyrdop siew khajna, bad ki nongpynïaid ïa ki jaka jngohkai, kaba lah ban wanrah ïa ki jingduhnong kiba lah ban saphriang lyngba ki social media bad pynsniew dur ïa ka nam jong ka Meghalaya ha ka pyrthei,” la maham ka MPSSM.
Ka jingïeng pyrshah ka la dep ban wanrah ïa ka jingpynsangeh ïa ki booking.Ki katto katne ki B2B Travel Agent kila iathuh ba ki la pynkylla ia ki lynti iaid ban kiar na Meghalaya bad pynleit jingmut ha ka jaka jong ki sha ki jaka kum ka Arunachal Pradesh, Nagaland, Uttarakhand, Himachal Pradesh, Bhutan, bad Ladakh. “Lada ki jingkhanglad ki dang bteng, ki nong jngohkai pyrthei kin boycott lut ïa ka Meghalaya,” ong u MPSSM, da kaba maham ba ka jylla ka don ha ka jingma kaba khraw.
Ka Association ka la pynksan ba ka kam jngohkai pyrthei ka dei ka “kam ba ïatreilang” kaba kynthup ïa ki nongïa don bynta lang kiba bun—naduh ki jaka sah ha ki homestay bad ki hotel haduh ki nongpynïaid, ki nongñiah kali, bad ki nongdie jingdie ha surok. “Ym don kawei ka kynhun kaba lah ban bat ia ka kam baroh kawei tang ha lade.Ia ka kam jngohkai pyrthei ha Meghalaya la tei ne don da ki phew snem da ka jingiatreilang, bad ym lah ban pynpra noh ia ka namar ki jingmyntoi ba la buh kyrpang”, la ong ka kyrwoh.
 kala pynbna da ka non-cooperation movement naduh ka por 5 baje mynstep ha ka 18 tarik u bnai Nailur.){kind=link}