Shillong, Naitung 07: U MLA ka Pynthorumkhrah bad nongialam ka BJP u Bah AL Hek u la kynran dien noh ban mih iakhun ia ka elekshon MP shiteng samoi ban wan na Shillong Lok Sabha bad u la tyrwa ia ka kyrteng jong u Myntri Sorkar bad MLA ka South Shillong constituency Bah Sanbor Shullai ban long u kyrtong.
U bah Hek u la iathuh ba ki nongialam ka party kila wan iakynduh ia u ban phah iakhun ia ka election shiteng samoi hynrei u la kyntait da kaba kdew ba u don kiwei pat ki jingkitkhlieh ban pyndep hapoh ka Jylla.
“Nyngkong la bthah ïa nga ban ïakhun ïa ka elekshon shiteng samoi. Hynrei nga la pyntip sha ka Party ba nga dang don kiwei pat ki kam ba nga dei ban peit hapoh ka Jylla, kumta ngan nym treh ban ïakhun, ka rai kaba khatduh mynta ka shong ha ka party” ong u bah Hek.
Utei u nongialam ba la rim bha jong ka Meghalaya BJP u la ong ba u la ai jingmut ia ka kyrteng jong u Bah Sanbor Shullai sha ki nongialam ka Party ha Delhi ban bishar bniah.
“Nga la tyrwa ia ka kyrteng jong u Bah Sanbor Shullai. Mynta ngin ap ia ki nongialam na Delhi ban rai mano mano ba ibit ban iakhun iaka ilekshon MP shiteng samoi” u la pynpaw.
U Bah Hek u la kyntait ruh iaka jingpynslem ban pynbna ia u kyrtong, da kaba ong ba ka party ka dang don por ban rai iaka kyrteng jong u kyrtong naka bynta ka ilekshon MP shiteng samoi.
“Ngi dang don por haduh kumba 20 tarik Naiwieng. Kata ka ailad ia ngi ban pynbna ia u kyrtong jong ngi. Ka elekshon ka dang sah sa 5 haduh 6 bnai, kumta ym lah ban ong ba ngi pynslem pynbna kyrtong. Ka por pynkhreh kaba 3 haduh 4 bnai ka long kaba biang palat na ka bynta ka elekshon shiteng samoi”, u la ong.
Ka shuki MP na Shillong Parliamentary ka la thylli noh hadien ka jingkhlad noh u MP Dr Ricky Aj Syngkon.
Na ka liang ka Election Commission haduh mynta kam pat pynbna ia ka tarik ban pynlong iaka elekshon MP shiteng samoi.
