Agartala, Naiwieng 12 :U heh nongialam jong ka TIPRA Motha u Pradyot Kishore Manikya Debbarma hynnin ka sngi ula ong ba ka sorkar BJP ha Tripura ym tang ba ka long pyrshah ia ka CPIM hynrei ruh ia ka TIPRA Motha.
Kane ka jingkren jong u Pradyot uba dei ruh u khun syiem ba hiar pateng ka jylla kala wan long hadien ba ka Tripura Sports Council kam shym la ai jingbit na ka bynta ban pyndonkam ia ka rynsan na ka bynta ban pynlong ia ka jingialang paidbah jong ka TIPRA Motha ka ban long mynta ka 12 tarik Naiwieng ha Swami Vivekananda Maidan.
Haba kren sha ki lad pathai khubor, u Pradyot ula ong; “Ka prokram jong ngi kan long mynta ka 12 tarik bad Nga la wan sha kane ka jaka ban bishar ia ka jingpynkhreh. Hynrei, ka long kaba sngew bynniaw ba wat hadien ba la siew ia baroh ka pisa sha ka Tripura Sports Council kaba ka Swami Vivekananda ground ka don, hynrei la khanglad ban pyndonkam ia ka rynsan.Katba ha kaba iadei bad ki prokram jong u Myntri Rangbahduh (PM) kin ai lut ia baroh, hynrei ha kaba iadei bad ka TIPRA Motha ym shym la ai jingbit ban pyndonkam ia ka rynsan.Kumta ngi la shna hi la ka jong ka rynsan.Hynrei, haduh mynta ka tip ba u PM ka ri un ym wan satia mynta u bnai.Ka sorkar ka dei ban pynsngap ia baroh.Nga nang tharai ba kane ka sorkar ka long pyrshah tang ia ka CPIM, hynrei mynta Nga sngew ba kane ka sorkar ka long pyrshah ruh ia ka TIPRA Motha kumjuh”.
Nalor kata ula ong ruh ba la khanglad ia ki kali jong ki nongtrei bda ki nongkyrshan jong ka party TIPRA Motha hapoh ki jaka pynieng kali bapher bapher ba kin wan poi sha Agartala na ka bynta ka jingialang paidbah.
“Nga kyrmen ba ki jingialang paidbah ha ka kynti kaba mynta kin kham jur bad kham bun ban ia kiba la dep.Hynrei, watla katta ki don ki jingeh namar la khanglad ia ki kali jong ki nongtrei bad ki nongkyrshan jong ngi ha ki jaka pynieng kali, bad kumta Nga kyrpad ia baroh kito kiba kwah ban wan ki dei ban wan poi shi sngi shwa jong ka prokram.Baroh ki dei ban wan.Kan ym don ka jingiaid paidbah ne ka jingiapyrta.Ngam kwah ia kino kino ki jingpyrta kiba long pyrshah ia kino kino ki kynhun bynriew ne niam. Ka dei ban long ka prokram kaba jai jai.Ngi kwah ban ai ka khubor sha ka ri ba ki briew jong ngi ki lah ban pynpaw ia ki sur ki jong ki da kaba jai jai bad ha ka rukom jong ka synshar paidbah, kata da kaba khlem pyndonkam atiar.Ngi kwah ia ka jingsuk ha ka jylla,” ong shuh shuh u Pradyot.
