New York, Nailur 27 : U Myntri kam korbar bar ri S Jaishankar ha ka sngi ba-ar ula kynnoh ba dei ki ‘Poiwir’ kiba dei ki daw bah ba mih ki kam iaumsnam ha Jylla Manipur haba pyntip ba ka Sorkar kala shim ia baroh ki lad ki lynti ha Manipur ha ka ban wanrah pat ia ka jingshngsuk ha ka Jylla.
U Myntri ula ong ba ki bor pahara kila don bun ha kane ka Jylla hynrei “Nga tharai, kawei na ki jingeh ha Manipur ka dei ka jingrung kyrthep ki poiwir”.
U Jaishankar ula kren ia kane ha ka Council on Foreign Relation haba jubab ia ka jingkylli halor ka jinglong jingman ha kane ka Jylla ka thain Shatei Lam Mihngi ka Ri India.
“Hynrei ki don ruh ki jingiakynad, kaba la don la slem bha. Bad mynta, nga tharai ka Sorkar Jylla bad ka Sorkar Pdeng kila shimkhia ha kaban wad ia ki lad ki lynti ban lah wanrah pat ia ka jingshongsuk” ula ong.
Haba sdang jong une u bnai, ki riewshemphang ka United Nation (UN) kila kynthoh jur halor ki khubor ka jingpynkhein ia ka hok longbriew manbriew bad jingleh tohmet ha Manipur.
Ki stad ka UN kila pynpaw ia ka jingsngewkhia halor ki khubor ba kynnoh leh khlemakor ia ki Kynthei, ka jingpyniap klep, ka jingpynjulor ia ki Iing ki sem, ka jingpynkylla phetwir ia ki paidbah, ka jingpynshitom beain bad kiwei kiwei.
“Ngi pangmet ban iohi ia ki khubor bad ki dur ba shah thombor ki spah ngut ki Longkmie bad ki Kynthei naduh kiba dang khynnah haduh kiba la rangbah khamtam eh jong ki paid bynriew Kuki kiba duna paid. Ki jingkynnoh thombor ki kynthup ia ka jingleh beijot paidbah, pyniaid lyngkhuit ia ki kynthei ha surok, jingshoh ba lam sha ka jingiap, bad jingthang im ia ki” ong ki riewshemphang ka UN.
