Shillong, Rymphang 09 : U National President ka National People’s Party (NPP) bad Myntri Rangbah ka Jylla Conrad K Sangma, ula ong ba dei ka jingjur palat ka jingsngew sarong kaba pynlong ia u Nongialam ka AITC Dr Mukul Sangma, ban phet noh na ka Congress namar ka jingshah jied u ma Vincent H Pala kum u President ka Congress ha Meghalaya.
U Conrad ula kren ia kane ha ka jingiaid ialap elekshon ha kylleng ki jaka jong ka 41-Songsak Constituency kaba mihkhmat da u Dr Mukul Sangma. U Conrad ula iaid ialap elekshon ha ryngkat u Symbud Lamphang ka Iingdorbar Timothy D Shira, ban pan ia ka jingkyrshan ia u kyrtong ka NPP Nihim D Shira, u ban iakhun pyrshah ia u Dr Mukul.
“Ka Congress Party kala iapait iapra. Ka Congress ka dei ka Liang Pyrshah kaba khlain bha ha ka Jylla. Ki ju iashimbynta shitrhem bha ha ki jingiatai bad ngi (NPP) ha Iingdorbar, Hynrei, ka jingiapait ka Congress kala pyntlot bor ia ka Liang Pyrshah. Kala nang tlot da ka jingpait sha sa ka TMC ha kaba bun ki dkhot ka MLA kila leit rung sha kiwei pat ki party.
Kane ka pynlong ban ym don satia ka Liang Pyrshah hapoh ka Jylla” ong u Conrad.
Haba khein ia ka NPP kum ka rynsan jong ki paid riewlum ka Jylla Meghalaya bad ki Jylla hapoh ka Ri bala pynkha da u (L) PASangma, ula pan ia ka jingkyrshan ban nang pynkhlain ia ka party (NPP) namar ka party kala nang khlain ha kylleng ki jaka ka Jylla bad ki paidbah ka Songsak ruh ki dei ban wanlang ha kaban vote noh ia ka NPP.
“Ngin sa thaw ia ka Sorkar ha Meghalaya da ka jingjop ba dap pura” ula ban jur.
“Ngim donkam than ban pyrkhat ia ka elekshon ban wan. Kala shai kdar ba ka NPP kan wan biang ha ka bor da ka jingjop kaba bun” ula pyntip sha ki nongthep vote ka Songsak bad pan ia ka rai jong ki na ka bynta u Nihim D Shira.
Ha Dagal, une u Khliehduh ka NPP ula ong ba wat hapdeng shibun ki jingtynjuh bala buh hakhmat ka Sorkar hapdeng ka jingwan lynshop ka khlam Covid, ka NPP kala kut jingmut ban pynthikna ia ka jingiaid shakhmat ka roi ka par.
“Ha kine ki san snem, ka Sorkar kala lah ban leh shibun kiei kiei kibym iahap satia bad kaei kaba la leh ha ki 20-30 snem bala leit noh. Ka Sorkar NPP kala shna ia bun bah ki surok ha kylleng ki jaka jong ka Jylla” ula bynrap.
U Conrad u pyntip ba ha ka jingdap 45 snem ka jingioh Jylla ba pura, tang 4500 tylli ki Longiing ha khappud kila ioh ia ka umbam umdih hala iing hapoh ka Jylla hynrei ka Sorkar ba ialam da ka NPP kala pynioh haduh 3 lak ki longiing ia ki umbam umdih hala iing lyngba ka skhim JJM ha kine ki lai snem.
U Conrad ula ong ba haba buh hakhmat ia ka jingmyntoi ki paidbah, ka Sorkar ba ialam da ka NPP kala pynleit jingmut eh ha ki kam pynroi ha baroh ki liang hapoh ka Jylla. Ula ong ka Sorkar kala aibor ia ba baroh ki MLA ha ki District bad ki Constituency ba kin rai ia kiei ki jingdonkam ba bha tam ba kin leh kat kum ki jingdonkam ba hakhmat eh.
“Ki MLA jong ngi kila long Myntri Rangbah hala ki jong ki Constituency. Ngi la aibor ia baroh ki MLA namar ngi kwah ba ki Nongmihkhmat paidbah kin rai hi dalade ia kaei kaba bha tam na ka bynta ka constituency lajong” ong une u Khliehduh ka NPP.
Ula ban jur ba u MLA ka Songsak Dr Mukul Sangma um ju wan iakrren satia bad u bad namar kane, ka Sorkar kam shym la lah ban leh eiei na ka bynta ka Songsak. Hynrei u Kyrtong ka NPP Nihim D Shira u ju wan iaken man ka por bad u ban pynthikna ba ki kam pynroi bapher bapher bad ki kam bhalang kin tyllun lang ha ka thain Songsak.
Ula kynnoh ia u Dr Mukul Sangma halor ka jingiehkhunswet ia ki paidbah ka Constituency tang namar ka jingsngew meng bad jingsngew pher ha ki kam sain hima sima. Ula ong ba kum ki MLA khlem da khein party, ki dei ban wan iakren bad iatreilang bad ka liang synshar.
“Khublei ia u Nihim D Shura, uba la trei shitom na ka bynta la bha ka miat jong ki paidbah ka Songsak, ba ki prokram bad ki skhim ka Sorkar kila wan hapoh ka Constituency” ula bynrap.
U kyrtong ka NPP na Songsak Nihim D Shira ula pan ia ka jingkyrshan na ki nongthep vote halor ka nongrim ba u dei u trai shnong.
Ula ong ba u Dr Mukul Sangma ula shet kylla ia ki paidbah ka Songsak bad ka dei ka por ia ki paidbah ban rai bad kyntait noh ia u Dr Mukul.
“Ki paidbah ka Songsak kila ai ka jingkyrshan hynrei ula jied ia ka Tikrikilla. Balei ba ki paidbah ka Songsak kin vote ia u nongwei?. Kala dei ka por ia ki paidbah ka Songsak ba kin ai ka jingshaniah ha u Trai Snong” ula ong.
