Shillong, Rymphang 21 : U Chief Executive Member (CEM) bad kyrtong ka NPP na Nongthymmai Bah Pyniaid Sing Syiem ha ka sngi Thohdieng, ula kynnoh ba u President ka Voice of the People Party (VPP) Ardent M Basaiawmoit, ula ialam bakla ia u halor ka Article 371.
“Lada ki briew na kiwei ki Jylla, ki bym don Sixth Schedule , ki iakhun mynta bad shah jingit ban ioh ia ka, kumno kan lah long ba ka Jylla kum jong ngi, kaba la ioh ia ka jingiada na ka Sixth Schedule kam sngewthuh ia ka bor jong ka” ong u Bah Pyniaid hadien ba dep thep vote.
“Ha ki snem bala leit, ngi la shah ialam bakla ha u President ka VPP ha kaba ula kam ba ka jingdawa ia ka Artcile 371 kan ym lam sha ka jingpynduh noh ia ka Sixth Schedule. Hynrei hadien bala pule bha ia baroh ar, ngi shem ba ka Sixth Schedule ka khlam khlain ban ia ka Article 371 namar ka ai ka jingiada bad tyngkai ia ka riti ka dustur ba riewspah jong ngi” ula ong.
Haba pynpaw ia ka jingsngewskhem ban jop ia ka elekshon, u Bah Pyniaid ula ong ba ka jingiaid lynti jong u ban shakri ia ki paidbah ka Nongthymmai kala sdang.
“Ngi sngewskhem ba ki paidbah kin vote ia ka party haba pynshong nongrim ia ki jingpyrshang jong ngi ban nang pynkhlain ia ka sixth schedule bad ban leh eiei halor ki mat kiba kongsan. Nalor kane, ngi la lah ban mynjur ia bun ki bill ba kongsan ban iada ia ka Jaidbynriew bad ngi pynthikna ruh ia ka roi ka par jong ki constituency” ula bynrap.
Ula ban jur ia ka jingdonkam ban leh eiei halor ka jingkyrduh um bala mad da ki paidbah ka constituency nalor ka jingwad ia ki lad ki lynti ban weng ia ka jingeh ha ka jingbym iohkam iohjam da kaba buh ia ki coaching centre, ka vocational training, skill development bad ruh ban buh ia ka rehabilitation centre jong ki nongdih droks.
Haba ban jur ia ka jingdonkam ban kyntiew ia ki kam ialehkai hapdeng ki kam, u Bah Pyniaid ula ong “Ngan sa tyrwa ban shna ia artylli ki madan hapoh ka nongthymmai constituency ka ban ai jingmyntoi ia ki khynnah bad ki samla ba don sap”.
Ula ban jur ruh ia ka jingdonkam ban pynjanai ia ki jaka ai jingsumar hapoh ka constituency.
